പാലക്കാട്: മലമ്പുഴ വില്ലേജ് ഓഫിസിലെ ജീവനക്കാരിയോട് മോശമായി പെരുമാറിയെന്ന പരാതിയില്‍ മലമ്പുഴ അകമലവാരം ഏലാക്ക് പാറയ്ക്കല്‍ വീട്ടില്‍ ബാലകൃഷ്ണനെ (54) പൊലിസ് അറസ്റ്റ് ചെയ്തു. വില്ലേജ് ഓഫിസിലെത്തിയ ബാലകൃഷ്ണന്‍ ജീവനക്കാരിയോട് മോശമായി പെരുമാറിയെന്നും ഇതു തടയാന്‍ ശ്രമിച്ച മറ്റു ജീവനക്കാരെ കയേറ്റം ചെയ്യാന്‍ ശ്രമിച്ചുമെന്നുമാണ് പരാതി. ഓഫിസിലെ ഉപകരണങ്ങളും അടിച്ചു തകര്‍ത്തു. ഇയാള്‍ വാഹന വായ്പയെടുത്ത് തിരിച്ച് അടയ്ക്കാതെ മുങ്ങിനടന്ന കേസില്‍ ശിക്ഷ അനുഭവിച്ചിട്ടുണ്ട്.
സര്‍ക്കാര്‍ ഉദ്യോഗസ്ഥര്‍ക്കെതിരേ വ്യാജ പരാതി നല്‍കി പണം തട്ടാന്‍ ശ്രമിച്ചെന്ന പരാതിയില്‍ ഇയാള്‍ക്കെതിരേ അന്വേഷണം നടക്കുന്നുണ്ട്. ഏലാക്ക് എസ്റ്റേറ്റിലെ ജീവനക്കാരനായ ഇയാള്‍ അവിടെ ഒളിച്ചുതാമസിച്ച് വരികയായിരുന്നു. മലമ്പുഴ എസ്.ഐ എസ്. ഷെമീറിന്റെ നേതൃത്വത്തിലായിരുന്നു അറസ്റ്റ്. കോടതി ഇയാളെ റിമാന്‍ഡ് ചെയ്തു.