കൂത്തുപറമ്പ്: വെള്ളമെടുക്കവേ അബദ്ധത്തില്‍ ആള്‍മറയില്ലാത്ത വീട്ടുകിണറ്റില്‍ വീണ വയോധികയെ നാട്ടുകാരും ഫയര്‍ഫോഴ്‌സുമെത്തി രക്ഷപ്പെടുത്തി.
കണ്ടംകുന്ന് കോമത്ത് വളപ്പില്‍ ജാനകിയാണ് ഇന്നലെ രാവിലെ 10.15 ഓടെ വെള്ളമെടുക്കവെ കാല്‍വഴുതി 20 കോല്‍ താഴ്ചയുള്ള കിണറ്റിലേക്കു വീണത്. ഉടന്‍ സ്ഥലത്തെത്തിയ നാട്ടുകാര്‍ കിണറ്റിലേക്കിട്ടു കൊടുത്ത കയറില്‍ പിടിച്ച് സ്ത്രീ നില്‍ക്കുകയായിരുന്നു. അപ്പോഴേക്കും സ്ഥലത്തെത്തിയ കൂത്തുപറമ്പ് ഫയര്‍ഫോഴ്‌സ് സംഘത്തിലെ ഫയര്‍മാന്‍ ഷിജിലും ഹോംഗാര്‍ഡ് സുരേന്ദ്രനും കിണറ്റിലിറങ്ങി ജാനകിയെ കരയ്‌ക്കെത്തിച്ചു. കാലിനു പരുക്കേറ്റ ജാനകിക്ക് താലൂക്ക് ആശുപത്രിയില്‍ ചികിത്സ നല്‍കി. സ്റ്റേഷന്‍ ചാര്‍ജ് ഓഫിസര്‍ രതീശന്‍, ലീഡിങ് ഫയര്‍മാന്‍ കെ.കെ ദിലീഷ്, ഫയര്‍മാന്മാരായ സുജിത്ത്, സിനീ ഷ്, മധു എന്നിവരും ഫയര്‍ഫോഴ്‌സ് സംഘത്തിലുണ്ടായിരുന്നു.