ആലപ്പുഴ: അവകാശാധിഷ്ഠിതമായ സമൂഹത്തില്‍ നിയമസാക്ഷരത പരമപ്രധാനമാണെന്ന് ധനമന്ത്രി ഡോ. ടി.എം. തോമസ് ഐസക്. ജില്ലാ നിയമസേവന അതോറിട്ടി ആലപ്പുഴ നഗരസഭയുമായി ചേര്‍ന്ന് നടപ്പാക്കുന്ന തെളിമ പദ്ധതി ഉദ്ഘാടനം ചെയ്യുകയായിരുന്നു അദ്ദേഹം.
വികസന കാര്യങ്ങളില്‍ പൗരന്റെ പങ്ക് അവകാശമാണിന്ന്. ഒരു സര്‍ക്കാരിന്റേയും ഔദാര്യമല്ല. തൊഴിലുറപ്പ് പദ്ധതിയില്‍ തൊഴിലാളികള്‍ക്ക് പണം ലഭിക്കാതായിട്ട് ആറുമാസം കഴിഞ്ഞു. ഇത്തരം അവകാശങ്ങള്‍ നിഷേധിക്കപ്പെടുമ്പോള്‍ നിയമസേവന സമിതികളുടെ ഇടപെടല്‍ ഉണ്ടാകണമെന്ന് അദ്ദേഹം ആവശ്യപ്പെട്ടു.സാക്ഷരത പ്രസ്ഥാനം, ജനകീയാസൂത്രണം പോലെ ബഹുജന വിദ്യാഭ്യാസ യജ്ഞമായി ഇതുമാറണം. സമൂഹത്തില്‍ നിയമവാഴ്ചയില്ലെങ്കില്‍ മുകളില്‍ നിന്ന് അടിച്ചേല്‍പിക്കുന്നതാകും നിയമം.
സേവനാവകാശം നിലവില്‍ ഉണ്ടെങ്കിലും ആശയറ്റ നിലയില്‍ ഒരു കര്‍ഷകന്റെ നിര്‍ഭാഗ്യകരമായ ആത്മഹത്യ ഉണ്ടാകുന്നു. വില്ലേജ് ഓഫീസ് മുതല്‍ അദ്ദേഹത്തിന് വിവരങ്ങള്‍ നല്കിയിരുന്നെങ്കില്‍ അതൊഴിവാകുമായിരുന്നു. സമൂഹത്തില്‍ അഭിപ്രായം സ്വരൂപിക്കുന്ന പഞ്ചായത്തംഗങ്ങള്‍ മുതലുള്ളവരെ നിയമസാക്ഷരതരാക്കുന്നതിലൂടെ ഇതിന് പരിഹാരം കാണാനാകുമെന്ന് ധനമന്ത്രി പറഞ്ഞു.എതൊരു ഭരണാധികാരിയിലും നിക്ഷിപ്തമായ ധര്‍മം പൗരന് നീതി ലഭ്യമാക്കുകയെന്നതാണെന്നും നീതിന്യായ വ്യവസ്ഥയുടെ പൂര്‍ത്തീകരണമാണ് ഭരണഘടന വിവക്ഷിക്കുന്നതെന്നും മുഖ്യപ്രഭാഷണം നടത്തിയ ജസ്റ്റിസ് സി.കെ. അബ്ദുള്‍റഹീം ചൂണ്ടിക്കാട്ടി.
നിയമസാക്ഷരത എല്ലാ ജനങ്ങളിലും എത്തിക്കണമെന്ന് ഭരണഘടന ഊന്നിപ്പറയുന്നു. വിവേചന സഹായ പ്രവര്‍ത്തനം നടപ്പാക്കണം. നീതിന്യായ വ്യവസ്ഥയിലേക്ക് ഓരോ പൗരനും എത്താന്‍ കഴിയണമെന്നും അദ്ദേഹം പറഞ്ഞു. ജില്ല ജഡ്ജി കെ.എം. ബാലചന്ദ്രന്‍ ആധ്യക്ഷത വഹിച്ച ചടങ്ങില്‍ കെ.സി. വേണുഗോപാല്‍ എം.പി. ലോഗോ പ്രകാശനം ചെയ്തു. നഗരസഭാധ്യക്ഷന്‍ തോമസ് ജോസഫ് കൈപ്പുസ്തകം പ്രകാശനവും ചെയ്തു. ജില്ലാ പൊലീസ് മേധാവി വി.എം. മുഹമ്മദ് റഫീഖ്, ജില്ലാ ഗവണ്‍മെന്റ് പ്ലീഡര്‍ സി.വി. ലുമുംബ, ആലപ്പുഴ ബാര്‍ അസോസിയേഷന്‍ പ്രസിഡന്റ്  റ്റി.ജി. സനല്‍കുമാര്‍, തെളിമ കോഓര്‍ഡിനേറ്റര്‍ എ.എ. റസാഖ് എന്നിവര്‍ പ്രസംഗിച്ചു.
നിയമസേവന അതോറിട്ടി സെക്രട്ടറിയായ സബ് ജഡ്ജ് വി. ഉദയകുമാര്‍ പദ്ധതി വിശദീകരിച്ചു. എം.എ.സി.ടി ജഡ്ജ് സോഫി തോമസ് സ്വാഗതവും സെക്രട്ടറി കെ.ടി. അനീഷ് മോന്‍ നന്ദിയും പറഞ്ഞു.