പേരാമ്പ്ര: കോട്ടൂര്‍ ഗ്രാമപഞ്ചായത്തിന് പുറമെ കായണ്ണ ഗ്രാമ പഞ്ചായത്തിലും ചെങ്ങോടുമല കരിങ്കല്‍ ഖനനത്തിനേതിരെയുളള പ്രതിഷേധം ശക്തമാവുന്നു. കായണ്ണ ഗ്രാമ പഞ്ചായത്ത് 12ാം വാര്‍ഡ് ഗ്രാമസഭയില്‍ ചെങ്ങോടുമലയിലെ ഖനത്തിനെതിരെ സി.എം. ബിജു അവതരിപ്പിച്ച പ്രമേയം എതിരില്ലാതെ അംഗീകരിച്ചു. സ്ത്രീകള്‍ ഉള്‍പ്പെടെയുള്ള വോട്ടര്‍മാര്‍ ഗ്രാമസഭയില്‍ പങ്കെടുക്കാന്‍ ഞായറാഴ്ച്ച കാലത്തു തന്നെ നമ്പ്രത്തുമ്മല്‍ യമുന അങ്കണ്‍വാടിയിലെത്തിയിരുന്നു. കായണ്ണ ഗ്രാമ പഞ്ചായത്തിലെ പയറ്റാഴിഭാഗത്തുള്ള 300 ഏക്കറോളം വരുന്ന പാടശേഖരത്തിലേക്കുള്ള മൂന്ന് പ്രധാന നീരൊഴുക്കുകള്‍ ഉദ്ഭവിക്കുന്നത് ചെങ്ങോടുമലയില്‍ നിന്നാണ്. പാറപൊട്ടിക്കുമ്പോഴുള്ള കരിങ്കല്‍ ചീളുകള്‍, പാറപ്പൊടി എന്നിവ വയലിലേക്ക് ഒലിച്ചെത്തുന്നതോടെ വയലുകളും നെല്‍ക്കൃഷിയും ക്രമേണ ഇല്ലാതാകും. പാറ പൊട്ടിച്ച് ചെങ്ങോട് മല ഇല്ലാതാകുന്നതോടെ ഈ ഭാഗത്തേക്കുള്ള നീരൊഴുക്ക് വന്‍തോതില്‍ കുറയും, അതുകൊണ്ട് ഒരു കാരണവശാലും ചെങ്ങോടുമലയില്‍ ഖനനം അനുവദിക്കരുതെന്ന് പ്രമേയം ആവശ്യപ്പെടുന്നു. ഗ്രാമ പഞ്ചായത്ത് പ്രസിഡന്റ് എന്‍. പത്മജ അധ്യക്ഷത വഹിച്ചു. വൈസ് പ്രസിഡന്റ് എ. എം. രാമചന്ദ്രന്‍ സ്വാഗതം പറഞ്ഞു. ലിനീഷ് നരയംകുളം, എ. കെ. പ്രഭീഷ്, ടി. എം. രാജേഷ്, ടി. കെ. പ്രബീഷ്, ബിജു കുനിയില്‍, ആദര്‍ശ് ശശി, സുരേഷ് ചീനിക്കല്‍, ടി. പി. സുധീഷ് എന്നിവര്‍ നേതൃത്വം നല്‍കി. കോട്ടൂര്‍ ഗ്രാമപഞ്ചായത്തിലെ നാല് വാര്‍ഡുകളിലെ ഗ്രാമസഭ നേരത്തെ ക്വാറിവിരുദ്ധ പ്രമേയം പാസാക്കിയിരുന്നു.