ദമാം: കടലിൽ തീപിടിച്ച ബോട്ടിൽ നിന്നും നാല് ഇന്ത്യക്കാരെ സഊദി രക്ഷപ്പെടുത്തി. കിഴക്കൻ സഊദിയിലെ അൽ ഖഫ്‌ജി സെക്റ്ററിലെ അതിർത്തി സേനയാണ് പതിവ് പട്രോളിംഗിനിടെ ബോട്ടിനു തീപിടിച്ചതായി കണ്ടെത്തിയത്. ഉടൻ തന്നെ സംഭവസ്ഥലത്തേക്ക് കുതിച്ചെത്തിയ സംഘം ഇതിലെ തൊഴിലാളികളെ രക്ഷപ്പെടുത്തുകയായിരുന്നു.

തീരത്ത് നിന്നും ഏകദേശം എട്ടു മൈൽ അകലെ ഉൾക്കടലിലാണ് ബോട്ട് അപകടത്തിൽ പെട്ടത്. വിവരമറിഞ്ഞ ഉടൻ തന്നെ സ്ഥലത്തെത്തിയ തങ്ങൾ ബോട്ടിലുണ്ടായിരുന്നവർ രക്ഷപ്പെടുത്തിയെന്നും ആർക്കും പരിക്കേറ്റില്ലെന്നും ഗാർഡുകൾ തീ നിയന്ത്രണ വിധേയമാക്കിയെന്നും അതിർത്തി ഗാർഡ് വക്താവ് ലഫ്റ്റനൽ അബ്‌ദുൽ മാലിക് അൽ അബ്‌ദുൽ ഖാദിർ പറഞ്ഞു. നാലു പേരും ഇന്ത്യൻ പൗരന്മാറിയിരുന്നുവെന്നും അദ്ദേഹം കൂട്ടിച്ചേർത്തു.