ചെറുവത്തൂര്‍: ജാതി സര്‍ട്ടിഫിക്കറ്റ് ലഭിക്കാത്തതു കാരണം മണിമാലയുടെ പഠനം മുടങ്ങില്ല. ജാതി തെളിയിക്കുന്ന സര്‍ട്ടിഫിക്കറ്റ് വില്ലേജ് ഓഫിസില്‍ നിന്ന് ലഭിക്കും. ഹയര്‍സെക്കന്‍ഡറി പരീക്ഷയില്‍ ഉന്നത വിജയം നേടിയിട്ടും ജാതി തെളിയിക്കാന്‍ കഴിയാത്തതിനാല്‍ തുടര്‍പഠനം വഴിമുട്ടി ഫാന്‍സി കടയില്‍ തൊഴിലെടുക്കുന്ന മണിമാലയുടെ വിഷമങ്ങള്‍ സുപ്രഭാതം റിപ്പോര്‍ട്ട് ചെയ്തിരുന്നു.
ജില്ലാ കലക്ടര്‍ ജീവന്‍ ബാബു ചെറുവത്തൂര്‍ വില്ലേജ് ഓഫിസില്‍ നേരിട്ടെത്തിയതിനുശേഷം നിലവിലെ വ്യവസ്ഥകളുടെ അടിസ്ഥാനത്തില്‍ ഗൗണ്ടര്‍ വിഭാഗത്തിലാണെന്ന് തെളിയിക്കുന്ന ജാതി സര്‍ട്ടിഫിക്കറ്റ് നല്‍കാമെന്ന് വില്ലേജ് ഓഫിസര്‍ അറിയിച്ചു.
പക്ഷെ തമിഴ്‌നാട്ടില്‍ ഒ.ബി.സി ലിസ്റ്റിലുള്ള ഈ വിഭാഗത്തില്‍ പെട്ടവര്‍ കേരളത്തിലെ ഒ.ബി.സി ലിസ്റ്റിലില്ല. അതിനാല്‍ ആനുകൂല്യങ്ങള്‍ ലഭിക്കാന്‍ കടമ്പകള്‍ ഏറെ കടക്കേണ്ടി വരും. 74 ശതമാനം മാര്‍ക്കുള്ളതിനാല്‍ ഉന്നതപഠനത്തിനു ഇനി മണിമാലയ്ക്ക് പ്രവേശനം ലഭിക്കും. എന്നാല്‍ ആനുകൂല്യങ്ങള്‍ ലഭിച്ചില്ലെങ്കില്‍ സാമ്പത്തിക പ്രതിസന്ധി മൂലം പഠനം തുടരാനാകാതെയാകും. പഠനം നടത്തുമ്പോഴും അവധി ദിവസങ്ങളില്‍ കടകളില്‍ ജോലിക്ക് നിന്നാണ് മണിമാല പഠനത്തിനുള്ള വഴികണ്ടെത്തിയത്.
കൂലിത്തൊഴിലാളികളായ മാതാപിതാക്കള്‍ക്ക് മകളുടെയും മകന്റെയും പഠന ചെലവും ജീവിതചെലവും താങ്ങാനാവുന്നതിലും അപ്പുറമാണ്. ചെറുവത്തൂര്‍ റെയില്‍വേ സ്റ്റേഷന് സമീപത്തെ കൊച്ചു കൂരയില്‍ കഴിയുന്ന ഈ മിടുക്കിക്ക് സുമനസുകളാരെങ്കിലും കൈത്താങ്ങാവുമെന്ന പ്രതീക്ഷയിലാണ് മാതാപിതാക്കളായ തിരുവെങ്കിടവും ശാന്തിയും.
വിദ്യാഭ്യാസ അവകാശ നിയമപ്രകാരം ഇതരസംസ്ഥാനങ്ങളില്‍നിന്നുള്ള കുട്ടികളെ കേരളത്തിലെ പൊതുവിദ്യാലയങ്ങളില്‍ പ്രവേശിപ്പിക്കുന്നുണ്ട്. അതിദയനീയമായ ജീവിത സാഹചര്യങ്ങളില്‍ കഴിയുന്നവരായാല്‍ പോലും ഈ വിദ്യാര്‍ഥികള്‍ക്ക് യാതൊരുവിധ ആനുകൂല്യങ്ങളും ലഭിക്കാറില്ല. തസ്തികകള്‍ നിലനിര്‍ത്താനുള്ള കണക്കുകളിലെ കുട്ടികള്‍ മാത്രമായാണ് ഇവരെ ഇപ്പോഴും കണക്കാക്കുന്നത്.