ഇരിക്കൂര്‍: ഇരിക്കൂര്‍ മഹല്ല് ജമാഅത്ത് മേഖലയെ സമ്പൂര്‍ണ മാലിന്യ ലഹരി മുക്തവും ശുചിത്വ ആരോഗ്യ മേഖലയുമാക്കി മാറ്റുക എന്ന ലക്ഷ്യത്തോടെ ഗ്രീന്‍ ക്ലീന്‍ ആരോഗ്യ മഹല്ലാക്കി മാറ്റാനുള്ള പദ്ധതിക്ക് രൂപം നല്‍കി. ഇതിന്റെ ഭാഗമായി മഹല്ലിലെ വീടുകളും പരിസരവും കലാലയങ്ങളും പൊതുസ്ഥാപനങ്ങളും മതവിദ്യാഭ്യാസ സ്ഥാപനങ്ങളും പൂര്‍ണമായും മാലിന്യ മുക്തവും ലഹരി മുക്തവുമാക്കി മാറ്റും.  ആരോഗ്യ ശുചിത്വ ബോധവല്‍ക്കരണ കാംപയിന്‍ നടത്തി ജനങ്ങളെ ബോധവല്‍ക്കരിക്കും. വിദ്യാര്‍ഥികളെ കര്‍മ സന്നദ്ധരായ യുവാക്കളെയും ഉപയോഗപ്പെടുത്തി പദ്ധതി നടപ്പിലാക്കും. ഖത്തീബുമാര്‍, മുഅല്ലിമുകള്‍, അധ്യാപകര്‍, പി.ടി.എ മാനേജ്‌മെന്റ് പ്രതിനിധികള്‍ എന്നിവരെ ഉള്‍പ്പെടുത്തി മോട്ടിവേഷന്‍ ക്ലാസ്, വര്‍ക്കേഴ്‌സ് മീറ്റ്, പാരന്റ്‌സ് മീറ്റ്, സ്റ്റുഡന്റ്‌സ് മീറ്റ്, സ്‌ക്വാഡ് വര്‍ക്ക്, ചിത്രപ്രദര്‍ശനം, ലഘുലേഖ വിതരണം, സി.ഡി പ്രദര്‍ശനം തുടങ്ങിയവ നടത്തും.
മഹല്ലില്‍ പ്രത്യേക ക്ലസ്റ്ററുകള്‍ രൂപീകരിച്ചായിരിക്കും പ്രവര്‍ത്തനങ്ങള്‍ ഏകോപിപ്പിക്കുക. ഇരിക്കൂര്‍ മഹല്ലിലെ ഇരിക്കൂര്‍, പടിയൂര്‍, മലപ്പട്ടം പഞ്ചായത്തുകളിലും ശ്രീകണ്ഠപുരം മട്ടന്നൂര്‍ നഗരസഭകളിലും വ്യാപിച്ചുകിടക്കുന്ന പ്രദേശങ്ങള്‍ക്ക് ഇതിന്റെ ഗുണം ലഭ്യമാവും. സംസ്ഥാനത്ത് ഇത്തരത്തിലുള്ള മാതൃക പദ്ധതി നടപ്പിലാക്കുന്ന ആദ്യത്തെ മഹല്ലായിരിക്കും ഇരിക്കൂര്‍.