തിരൂര്‍: ബൈക്കുമായി പെട്രോള്‍ പമ്പില്‍ ഇന്ധനം നിറക്കാനെത്തിയ രണ്ടംഗ സംഘം സെയില്‍സ്മാനില്‍നിന്ന് പണം തട്ടിയെടുത്ത് മുങ്ങി. തിരൂര്‍ തൃപ്രങ്ങോട് ആലിങ്ങലിലെ പെട്രോള്‍ പമ്പില്‍ കഴിഞ്ഞ ദിവസം രാത്രി 11.30 ഓടെയാണ് സംഭവം. പണം കവര്‍ന്ന യുവാക്കളെ പിടികൂടാന്‍ ശ്രമിച്ച സെയില്‍സ്മാന് പരുക്കേറ്റു.
സെയില്‍സ്മാന്റെ കൈയിലുണ്ടായിരുന്ന നാലായിരത്തിലധികം രൂപയാണ് നഷ്ടപ്പെട്ടത്. സെയില്‍സ്മാന്‍ ബി.പി അങ്ങാടി സ്വദേശി മുരളിക്ക് വീഴ്ചയില്‍ പരുക്കേറ്റു. സംഭവത്തെ തുടര്‍ന്ന് പെട്രോള്‍ പമ്പ് ഉടമ തിരൂര്‍ പൊലിസില്‍ പരാതി നല്‍കി.
പണം പിടിച്ചുപറിച്ച് രക്ഷപ്പെട്ട സംഘം പൊന്നാനി ഭാഗത്തേക്കാണ് പോയത്. ബൈക്കില്‍ നമ്പര്‍ പ്ലേറ്റില്ലായിരുന്നുവെന്ന് പെട്രോള്‍ പമ്പിലെ സി.സി.ടി.വി ദൃശ്യത്തില്‍ വ്യക്തമാണ്.
സി.സി.ടി.വി ദൃശ്യത്തിന്റെയും സാക്ഷിമൊഴികളുടെയും അടിസ്ഥാനത്തില്‍ പൊലിസ് അന്വേഷണമാരംഭിച്ചിട്ടുണ്ട്.