നിസാര്‍ കലയത്ത്
ജിദ്ദ: ആഗോള നിക്ഷേപസംഗമത്തില്‍ പങ്കെടുക്കാന്‍ പ്രധാനമന്ത്രി നരേന്ദ്ര മോദി ഇന്നു സഊദിയിലെത്തും. ദ്വിദിന സന്ദര്‍ശനത്തില്‍ സുപ്രധാന കരാറുകളില്‍ ഇരുരാജ്യങ്ങളും ഒപ്പുവയ്ക്കും. മൂന്നു ദിവസങ്ങളിലായി റിയാദില്‍ നടക്കുന്ന ആഗോള നിക്ഷേപ സംഗമം ഫ്യൂച്ചര്‍ ഇന്‍വെസ്റ്റ്‌മെന്റ് ഇനിഷ്യേറ്റിവില്‍ പങ്കെടുക്കാനായാണ് പ്രധാനമന്ത്രി റിയാദില്‍ എത്തുന്നത്.
ഇന്നു വൈകുന്നേരം എത്തുമെങ്കിലും ചൊവ്വാഴ്ച മാത്രമാണ് പ്രധാനമന്ത്രിക്ക് ഔദ്യോഗിക പരിപാടികളുള്ളത്. പ്രധാനമന്ത്രിക്കൊപ്പം ഉന്നതതല നയതന്ത്ര സംഘവും ബിസിനസ് രംഗത്തെ പ്രമുഖരും എത്തുന്നുണ്ട്. ചൊവ്വാഴ്ച നടക്കുന്ന ഉദ്ഘാടന സമ്മേളനത്തില്‍ മോദി സംസാരിക്കും. സഊദി ഭരണാധികാരി സല്‍മാന്‍ രാജാവുമായും കിരീടാവകാശി മുഹമ്മദ് ബിന്‍ സല്‍മാനുമായും അദ്ദേഹം കൂടിക്കാഴ്ച നടത്തും.
സഊദി- ഇന്ത്യ വ്യാപാര കരാറുകളിലും ഇരു രാജ്യങ്ങളും ഒപ്പുവയ്ക്കും. സഊദി പങ്കാളിത്തത്തോടെ മഹാരാഷ്ട്രയില്‍ തുടങ്ങാന്‍ പദ്ധതിയിട്ട ഓയില്‍ റിഫൈനറി സ്ഥാപിക്കുന്നതുമായി ബന്ധപ്പെട്ട കരാറാണ് ഇതില്‍ പ്രധാനപ്പെട്ടത്. ഇന്ത്യന്‍ ഓയില്‍ കോര്‍പറേഷന്റെ ഔട്ട്‌ലെറ്റുകള്‍ സഊദിയില്‍ തുടങ്ങാനുള്ള കരാറിലും ഒപ്പുവയ്ക്കും. കൂടാതെ റുപേ കാര്‍ഡിന്റെ ഔദ്യോഗിക പ്രകാശനവും അദ്ദേഹം നിര്‍വഹിക്കും.
ഔദ്യോഗിക പരിപാടികള്‍ക്ക് ശേഷം നാളെ രാത്രി തന്നെ പ്രധാനമന്ത്രി ഇന്ത്യയിലേക്ക് മടങ്ങും.