മുതലമട: മുതലമടയില്‍ വീണ്ടും കാട്ടാനയുടെ ആക്രമണം. ചെമ്മണാമ്പതി അരശുമരകാട്ടില്‍ ഡോ. രജി മാത്യൂവിന്റെ വീടിന് മുന്നിലെ ഫെന്‍സിങ് ശനിയാഴ്ച രാത്രി ഒന്‍പതോടെ ഒറ്റയാന്‍ തകര്‍ത്തു. വീടിനുമുന്നിലെ ഈന്തപ്പനയും നശിപ്പിച്ചു.
ശബ്ദംകേട്ട് പുറത്തിറങ്ങിയ തോട്ടത്തിലെ കാവല്‍ക്കാരന്‍ മാധവന്റെ ഭാര്യ കാര്‍ത്ത്യായനി (52) ആനയെ കണ്ട് ഭയന്നോടി വീണതിനെതുടര്‍ന്ന് നിസാര പരുക്കേറ്റു. ഇവര്‍ നെന്മാറ സ്വകാര്യ ആശുപത്രിയില്‍ ചികിത്സതേടി. കഴിഞ്ഞ ഒരാഴ്ചയായി ചെമ്മണാമ്പതി അരശുമരക്കാട്ടിന്‍ ഒറ്റയാന്‍ ശല്യം രൂക്ഷമാണ്. രണ്ടുദിവസം മുന്‍പും റെജി മാത്യുവിന്റെ തോട്ടത്തിലെ തെങ്ങും മാവും നശിപ്പിച്ചിരുന്നു. കൂടാതെ സമീപത്തെ തോട്ടങ്ങളില്‍ ഇരുപതോളം തെങ്ങുകളും മാവുകളും കവുങ്ങുകളും കാട്ടാനകള്‍ നശിപ്പിച്ചിട്ടുണ്ട്.