തിരുവനന്തപുരം: മാണിയുമായി ഇനി ചര്‍ച്ചയില്ലെന്ന് കോണ്‍ഗ്രസ്. അങ്ങോട്ടുപോയി ചര്‍ച്ച നടത്തേണ്ടെന്നാണ് പാര്‍ട്ടിയിലെ പൊതുവികാരം. മാണിക്കു വേണമെങ്കില്‍ ചര്‍ച്ചയ്ക്ക് ഇങ്ങോട്ടു വരട്ടെ. മാണിയുടെ വിമര്‍ശനം പരിധിവിട്ടെന്നും കോണ്‍ഗ്രസ് നേതാക്കള്‍ കുറ്റപ്പെടുത്തി.

തീരുമാനം എടുത്തശേഷം മാണി ന്യായീകരണം കണ്ടെത്താന്‍ ശ്രമിക്കുകയാണ്. പാര്‍ട്ടിയെ മാണി  തെരുവില്‍ അപമാനിച്ചു. എന്നാല്‍ തല്‍ക്കാലം പ്രകോപിപ്പിക്കേണ്ടെന്നും തീരുമാനം എടുത്ത ശേഷം ശക്തമായി പ്രതികരിക്കാമെന്നുമാണ് പാര്‍ട്ടിയിലെ പൊതുവികാരം.


കോണ്‍ഗ്രസിനോടും സര്‍ക്കാരിനോടും ഇനി സമദൂരമെന്ന മാണിയുടെ നിലപാടില്‍ കോണ്‍ഗ്രസിന്റെ അമര്‍ഷമാണ് ഇപ്പോള്‍ നേതാക്കളിലൂടെ പുറത്തുവന്നത്.

ചരല്‍കുന്നില്‍ നടക്കുന്ന നിര്‍ണായകമായ നേതൃക്യാമ്പില്‍ മാണി കോണ്‍ഗ്രസിനെ വിമര്‍ശിച്ചിരുന്നു.  കേരളാ കോണ്‍ഗ്രസ് തറവാടിത്തമുള്ള രാഷ്ട്രീയ കക്ഷിയാണ്. കേരളാ കോണ്‍ഗ്രസ് എമ്മിനെ ആര്‍ക്കും ഒന്നും ചെയ്യാന്‍ കഴിയില്ല. ഭരണപക്ഷം നല്ലത് ചെയ്താല്‍ അംഗീകരിക്കുമെന്നും മാണി പറഞ്ഞിരുന്നു.