വളാഞ്ചേരി: വില്ലേജ് ഓഫിസറും വില്ലേജ് അസിസ്റ്റന്റും അവധിയില്‍. ആവശ്യത്തിന് ജീവനക്കാരില്ലാത്തതിനാല്‍ അവശ്യരേഖകള്‍ക്കായി ആരെ സമീപിക്കണമെന്നറിയാതെ പൊതുജനം വലയുന്നു. ഇരിമ്പിളിയം വില്ലേജ് ഓഫിസര്‍ രണ്ടു മാസമായി അവധിയിലാണ്. വില്ലേജ് അസിസ്റ്റന്റാവട്ടെ രണ്ടാഴ്ചത്തെ അവധിയില്‍ വിദേശ പര്യടനത്തിലുമാണ്.
വില്ലേജ് ഓഫിസറുടെ പകരം ചുമതല നല്‍കിയ ഉദ്യോഗസ്ഥന് സ്ഥലംമാറ്റവും. അദ്ദേഹം ഈ മാസം 30ന് സ്ഥലം വിടുന്നതോടെ ജനങ്ങള്‍ കൂടുതല്‍ ബുദ്ധിമുട്ടിലാകും. പിന്നെ ആകെയുള്ളത് ദിവസ വേതനാടിസ്ഥാനത്തില്‍ ജോലി ചെയ്യുന്ന ഒരു പാര്‍ട് ടൈം സ്വീപ്പര്‍ മാത്രം. ആഴ്ചയില്‍ രണ്ടോ മൂന്നോ ദിവസം താലൂക്കില്‍ വിവിധ ആവശ്യങ്ങള്‍ക്ക് പോകാനും ഫീല്‍ഡില്‍ പോയി രേഖകള്‍ പരിശോധിക്കാനും വിവിധ സര്‍ട്ടിഫിക്കറ്റുകള്‍ നല്‍കാനും ആവശ്യത്തിന് ജീവനക്കാരില്ലാത്തത് പൊതുജനത്തെ വലക്കുകയാണ്. അഞ്ച് പേര്‍ വേണ്ടിടത്താണ് കഴിഞ്ഞ കുറേകാലമായി മൂന്ന് പേരെ വച്ച് ഈ ഓഫിസ് പ്രവര്‍ത്തിച്ചിരുന്നത്. പകരം വന്ന ഉദ്യോഗസ്ഥനും കൂടി പോകുന്നതോടെ ജനം അവശ്യരേഖകള്‍ക്കായി ആരെ സമീപിക്കണമെന്നറിയാതെ വിഷമിക്കുകയാണ്. ജീവനക്കാരെ അടിയന്തിരമായി നിയമിക്കണമെന്ന് ഇരിമ്പിളിയം മണ്ഡലം കോണ്‍ഗ്രസ് കമ്മറ്റി യോഗം അധികാരികളോട്ആവശ്യപ്പെട്ടു.