തൃക്കരിപ്പൂര്‍: യൂത്ത് കോണ്‍ഗ്രസ് നേതാവിനെ ചുമട്ടുതൊഴിലാളികളായ ഒരു സംഘം വീട്ടില്‍കയറി തലക്കടിച്ചു വീഴ്ത്തിയതായി പരാതി. പിലിക്കോട് മണ്ഡലം യൂത്ത് കോണ്‍ഗ്രസ് പ്രസിഡന്റും പെയിന്റിങ് തൊഴിലാളിയുമായ വറക്കോട്ട് വയലിലെ കെ. റിജേഷി(34)നാണ് മര്‍ദനമേറ്റത്.
വീടു പണി നടക്കുന്നതിനാല്‍ കാലിക്കടവിലെ കെ.എസ്.ഇ.ബി ഓഫിസിനടുത്തുള്ള വാടക ക്വാര്‍ട്ടേഴ്‌സിലാണ് റിജേഷും കുടുംബവും താമസിക്കുന്നത്.
ഇന്നലെ രാവിലെ ഒന്‍പതോടെ വീട്ടില്‍ പത്രം വായിച്ചു കൊണ്ടിരുന്ന റിജേഷിനെ ഭാര്യയും മകളും നോക്കി നില്‍ക്കെ പത്തോളം വരുന്ന സംഘം തലക്ക് കല്ലു കൊണ്ട് ഇടിച്ചു വീഴ്ത്തുകയായിരുന്നുവെന്നാണ് പരാതി. സി.ഐ.ടി.യുക്കാരാണ് സംഭവത്തിനു പിന്നിലെന്നാണ് ആരോപണം. ചന്തേര പൊലിസ് കേസെടുത്തു.