കക്കട്ടില്‍: ഹര്‍ത്താല്‍ ദിനത്തില്‍ അമ്പലകുളങ്ങരയില്‍ കാര്‍ തടഞ്ഞു നിര്‍ത്തി സി.പി.എം ജില്ലാ സെക്രട്ടറി പി. മോഹനന്റെ മകന്‍ ജൂലിയസ് നികിതാസിനെയും മരുമകള്‍ സാനിയോ മനോമിയെയും ആക്രമിച്ചതുമായി ബന്ധപ്പെട്ട് പ്രദേശത്ത് ഉണ്ടായ സംഭവങ്ങള്‍ നാട്ടുകാരുടെ ഉറക്കം കെടുത്തിയിരിക്കുകയാണ്.
സംഭവത്തില്‍ പ്രതികളായവരെ അറസ്റ്റ് ചെയ്തതിനു ശേഷം മലയാട പൊയില്‍ ഭാഗത്ത് വീടുകള്‍ക്ക് നേരെയുണ്ടായ ആക്രമണങ്ങളും രാത്രികാലങ്ങളിലെ ബോംബ് സ്‌ഫോടനങ്ങളും ആശങ്ക ഇരട്ടിയാക്കിയിരിക്കുകയാണ്. രാത്രികാലങ്ങളിലെ സ്‌ഫോടന ശബ്ദങ്ങള്‍ക്ക് പുറമെ നവമാധ്യമങ്ങളിലൂടെയുള്ള ഊഹാപോഹങ്ങളും പ്രചരിക്കുന്നത് നാട്ടുകാരെ ഭീതിയിലാഴ്ത്തിയിരിക്കുകയാണ്. ക്രമസമാധാനം ഉറപ്പാക്കാന്‍ പൊലിസ് പട്രോളിങ് ശക്തമാക്കലും വാഹന പരിശോധനകളും ആവശ്യമാണ്.
കേസില്‍ ഉള്‍പ്പെട്ട മൂന്ന് ആര്‍.എസ്.എസ് പ്രവര്‍ത്തകരെ കഴിഞ്ഞ ദിവസം കുറ്റ്യാടി സി.ഐ എന്‍. സുനില്‍ കുമാറും സംഘവും അറസ്റ്റു ചെയ്തിതിരുന്നു. മേഖലയില്‍ പൊലിസ് റെയ്ഡ് ശക്തമാക്കണമെന്നും നാട്ടുകാര്‍ ആവശ്യപ്പെടുന്നുണ്ട്. മേഖലയില്‍ രാഷ്ട്രീയ സംഘര്‍ഷങ്ങള്‍ കുറഞ്ഞു വരുന്ന ഘട്ടത്തിലാണ് സംഘര്‍ഷമരങ്ങേറിയത്. നാദാപുരം, കുറ്റ്യാടി മേഖലയിലെ രാഷ്ട്രീയ സംഘര്‍ഷം പ്രദേശത്തിനുണ്ടാക്കിയ പേരുദോഷം മാറി വരുന്നതിനിടയിലുണ്ടായ ഏറ്റുമുട്ടലുകള്‍ വ്യാപകമാവാതിരിക്കാനുള്ള നടപടികള്‍ രാഷ്ട്രീയ പാര്‍ട്ടികളില്‍ നിന്നും പൊലിസില്‍ നിന്നും ഉണ്ടാവണമെന്നാണ് നാട്ടുകാര്‍ പറയുന്നത്. ശക്തമായ ഇടപെടലിലൂടെ മാത്രമെ സമാധാനം തകര്‍ക്കാനുള്ള നീക്കം തടയാനാവൂ എന്നാണ് നാട്ടുകാരുടെ അഭിപ്രായം.