മുക്കം: തെരുവ് നായകളെ കൊന്ന് റോഡരികില്‍ തള്ളിയ നിലയില്‍ കണ്ടെത്തി. മുക്കം നഗരസഭയിലെ മാമ്പറ്റ കൈയ്യിട്ടാംപ്പൊയില്‍ റോഡരികിലെ വയലിലാണ് എട്ടോളം തെരുവുനായകളെ കൊന്ന് തള്ളിയത്.
ആളൊഴിഞ്ഞ പ്രദേശത്ത് മാലിന്യങ്ങള്‍ സ്ഥിരമായി തള്ളുന്ന സ്ഥലത്താണ് നായകളുടെ ശവം കണ്ടെത്തിയത്. കൂടെ ചാക്കുകളിലാക്കി മദ്യക്കുപ്പികളും മറ്റു മാലിന്യങ്ങളും തള്ളിയിട്ടുണ്ട്. നിരവധി പേര്‍ ഉപയോഗിക്കുന്ന പമ്പ് ഹൗസിനും കിണറിനും അടുത്താണ് ഇവ ഉപേക്ഷിച്ചത്. മാലിന്യം തള്ളുന്നതിനെതിരേ മുന്നറിയിപ്പ് ബോര്‍ഡുകളും മറ്റും ഇവിടെ സ്ഥാപിച്ചിട്ടുണ്ടെങ്കിലും പ്രയോജനമില്ലെന്ന് നാട്ടുകാര്‍ ചൂണ്ടിക്കാട്ടുന്നു.
റോഡിന്റെ മറ്റുഭാഗങ്ങളിലും നിരവധി ചാക്കുകളിലാക്കിയ മാലിന്യം ഇപ്പോഴുമുണ്ട്. കൈയ്യിട്ടാംപൊയില്‍ റോഡിന്റെ വിവിധ ഭാഗങ്ങളിലായി ഇതിനുമുമ്പും വ്യാപകമായി മാലിന്യങ്ങള്‍ തള്ളിയിട്ടുണ്ട്. നായകളെ നാട്ടുകാരുടെ നേതൃത്വത്തില്‍ കുഴിച്ചുമൂടി. മുക്കം നഗരസഭയിലും പൊലിസിനും പരാതി നല്‍കിയിട്ടുണ്ട്. സംഭവത്തില്‍ അന്വേഷണം നടത്തണമെന്നും ഇരുട്ടിന്റെ മറവില്‍ മാലിന്യം തള്ളുന്നവര്‍ക്കെതിരേ നടപടി സ്വീകരിക്കണമെന്നും നാട്ടുകാര്‍ ആവശ്യപ്പെട്ടു. നാട്ടുകാരുടെ സഹകരണത്തോടെ സി.സി.ടി.വി കാമറ ഉള്‍പ്പെടെയുള്ളവ പ്രദേശത്ത് സ്ഥാപിക്കുമെന്ന് നഗരസഭാ കൗണ്‍സിലര്‍ പി.ടി ബാബു പറഞ്ഞു.