തോമാട്ടുചാല്‍: സ്‌കൂള്‍ കലോത്സവങ്ങളില്‍ ക്ഷേത്രകലയില്‍ മത്സരാര്‍ഥികള്‍ കുറയുന്നു.
സാമ്പത്തിക ചിലവാണ് ഇതിന് പ്രധാന കാരണം. കലോത്സവ വേദികളില്‍ മറ്റ് കലകളിലെ മത്സരാര്‍ഥികള്‍ക്ക് ലഭിക്കുന്ന ഒരു ആനുകൂല്യവും ഇവര്‍ക്ക് ലഭിക്കുന്നില്ലതാണ് മറ്റൊരു കാരണം. മറ്റ് കലകളില്‍ ചെറിയ തെറ്റുകള്‍ സംഭവിച്ചാലും കുട്ടികള്‍ക്ക് എ ഗ്രേഡ് ലഭിക്കുമ്പോള്‍ കണിശമായ വിധിനിര്‍ണയമാണ് ക്ഷേത്രകലകളില്‍ നടക്കുന്നത്. കഴിഞ്ഞ സംസ്ഥാന കലോത്സവത്തില്‍ പല കുട്ടികള്‍ക്കും ഗ്രേഡുകള്‍ കുത്തനെയിടിഞ്ഞതും കുട്ടികളെ ക്ഷേത്രകലയില്‍ നിന്ന് അകറ്റാന്‍ കാരണമായെന്ന് കഥകളി അഭ്യസിക്കുന്നവര്‍ പറയുന്നു. ജില്ലാ കലോത്സവത്തില്‍ ക്ഷേത്ര കലകളായ കഥകളി, ഓട്ടംതുള്ളല്‍, ചാക്യാര്‍കൂത്ത്, നങ്ങ്യാര്‍കൂത്ത് എന്നിവയില്‍ മത്സരിക്കാനെത്തിയത് ആകെ 12 പേരാണ്. ഇതില്‍ നങ്ങ്യാര്‍കൂത്തിനും ചാക്യാര്‍കൂത്തിനും ഒരു മത്സരാര്‍ഥി മാത്രമാണുണ്ടായത്.
അതും ഹൈസ്‌കൂള്‍, ഹയര്‍സെക്കന്‍ഡറി വിഭാഗങ്ങളിലായി. കഥകളിക്കും ഓട്ടന്‍തുള്ളലിലും രണ്ട് വിഭാഗങ്ങളിലുമായി അഞ്ച് ടീമുകളാണ് മത്സരിക്കാനെത്തിയത്. കുട്ടികളെയും രക്ഷിതാക്കളെയും ഈ കലയില്‍ നിന്ന് പിന്നോട്ടടുപ്പിക്കുന്നതിന്റെ പ്രധാന കാരണം സാമ്പത്തിക ചിലവ് തന്നെയാണെന്നാണ് പരിശീലകര്‍ പറയുന്നത്. കഥകളിക്ക് ഒരു ടീമിനെ മൂന്ന് വേദികളിലും കൂടി എത്തിക്കാന്‍ വരുന്ന് ചിലവ് ഒന്നരലക്ഷത്തിന് മുകളിലാണ്. 10 ആളുകള്‍ അണിയറയില്‍ പ്രവര്‍ത്തിച്ചെങ്കില്‍ മാത്രമെ മത്സരാര്‍ഥിക്ക് വേദിയില്‍ ആടാനാവൂ.
പ്രധാനമായും രണ്ട്, നാല് ആളുകളാണ് കഥകളിയാടുക. എന്നാല്‍ നാലുപേര്‍ക്ക് ആടാനുള്ള പാട്ടുകള്‍ വളരെ വിരളമായതിനാല്‍ രണ്ടുപേരെയാണ് ഭൂരിഭാഗവും വേദിയിലെത്തിക്കുന്നത്. ഇതുകൊണ്ട് തന്നെ ഇവര്‍ക്കുള്ള സാമ്പത്തിക ബാധ്യതയും അധികരിക്കുകയാണ്. മറ്റ് ക്ഷേത്ര കലകളുടെയും അവസ്ഥ മറിച്ചല്ലെന്നും ഇതുമായി ബന്ധപ്പെട്ടവര്‍ പറയുന്നു.