തോമാട്ടുചാല്‍: കലോത്സവ നഗരിയിലെ പുലിയായി അശ്വിന്‍ ബെന്നി.
ഇന്നലെ നടന്ന എച്ച്.എസ്.എസ് വിഭാഗം നാടോടി നൃത്തത്തിലാണ് പുലിയായി എത്തി അശ്വിന്‍ ആസ്വാദകരുടെ മനം കവര്‍ന്നത്. ഒപ്പം ഒന്നാം സ്ഥാനവും എ ഗ്രേഡും കരസ്ഥമാക്കി സംസ്ഥാന തലത്തിലേക്ക് യോഗ്യതയും നേടി. ദ്വാരക സേക്രട് ഹാര്‍ട്ട് എച്ച്.എസ്.എസിലെ പ്ലസ്‌വണ്‍ വിദ്യാര്‍ഥിയായ അശ്വിന്‍ കഴിഞ്ഞ വര്‍ഷവും പുലിയായി ജില്ലാ കലോത്സവത്തില്‍ ഒന്നാംസ്ഥാനം നേടിയിരുന്നു.
നാട്ടിലിറങ്ങിയ പുലിയുടെ ആക്രമണത്തില്‍ തന്റെ പ്രിയപ്പെട്ടവര്‍ കൊല്ലപ്പെട്ടതിന്റെ വേദനയില്‍ പുലിയെ വകവരുത്തുകയാണ് അശ്വിന്‍. എന്നാല്‍ പിന്നീട് പുലിയുടെ അന്ത്യത്തില്‍ വേദനിക്കുകയും ചെയ്യുന്നുണ്ട് അശ്വിന്റെ കഥാപാത്രം.
കാണികളില്‍ ഇത് രണ്ടുകൈയും നീട്ടി സ്വീകരിച്ചു എന്നതിന്റെ തെളിവാണ് ഒന്നാംസ്ഥാനവുമായി സംസ്ഥാന തലത്തില്‍ മത്സരിക്കാന്‍ യോഗ്യത നേടിയത്. സാബു ജോര്‍ജിന്റെ ശിക്ഷണത്തിലാണ് അശ്വിന്‍ നാടോടി നൃത്തവും ക്ലാസിക്കല്‍ നൃത്തവും അഭ്യസിക്കുന്നത്.