ജിദ്ദ: പൊതുമാപ്പിന്റെ ഇളവില്‍ ഫൈനല്‍ എക്‌സിറ്റ് ലഭിച്ച വിദേശികള്‍ ഉടനെ രാജ്യം വിടണമെന്ന് സഊദി പാസ്‌പോര്‍ട്ട് വിഭാഗം അറിയിച്ചു. 90 ദിവസത്തെ പൊതുമാപ്പ് അവസാനിച്ചപ്പോള്‍ ഇതുവരെ നാലേമുക്കാല്‍ ലക്ഷം നിയമ ലംഘകര്‍ പദവി ശരിയാക്കി ഫൈനല്‍ എക്‌സിറ്റ് നേടിയിട്ടുണ്ടെന്നും ജവാസാത്ത് മേധാവി പറഞ്ഞു.

പൊതുമാപ്പ് അവസാനിക്കുന്നതോടെ എക്‌സിറ്റ് വിസയും റദ്ദാകും. പൊതുമാപ്പ് ആരംഭിച്ചത് മുതല്‍ നാട്ടിലേക്ക് മടങ്ങാന്‍ സഊദി പാസ്‌പോര്‍ട്ട് വിഭാഗത്തില്‍ നിന്നും ഫൈനല്‍ എക്‌സിറ്റിന് അനുമതി ലഭിച്ച മുഴുവന്‍ പേരും ശവ്വാല്‍ ഒന്നിന് മുന്‍പായി രാജ്യം വിടണം. അല്ലാത്തവര്‍ക്ക് പൊതുമാപ്പിന്റെ ആനുകൂല്യം ലഭിക്കില്ല. നിയമ ലംഘകരായി പരിഗണിച്ച് ഇവര്‍ക്കെതിരെ ശിക്ഷാ നടപടികള്‍ സ്വീകരിക്കുമെന്നും പാസ്‌പോര്‍ട്ട് വിഭാഗം മേധാവി സുലൈല്‍മാന്‍ അല്‍ യഹ്‌യ വ്യക്തമാക്കി.

വിരലടയാളം രേഖപ്പെടുത്തി സഊദിയിലേക്ക് തിരിച്ചു വരാനാവാത്ത വിധം നാടുകടത്തുമെന്നും അദ്ദേഹം പറഞ്ഞു. റമദാന്‍ അവസാനിക്കുന്നതോടെ പാസ്‌പോര്‍ട്ട് വിഭാഗം ഇതുമായി ബന്ധപ്പെട്ട എല്ലാ ഫയലുകളും റദ്ദാക്കും. അതോടെ ഇവര്‍ പൊതുമാപ്പിന്റെ ഇളവിന് അര്‍ഹരല്ലാത്തായി തീരുകയും ചെയ്യും.പരിശോധനയില്‍ പിടിക്കപ്പെട്ടാല്‍ തൊഴില്‍ താമസ നിയമ ലംഘകരായി പരിഗണിക്കും. പിഴ, ജയില്‍ വാസം, നാടുകടത്തല്‍ എന്നിവയാണ് ഇവര്‍ക്കുള്ള ശിക്ഷ. അതിനിടെ നിയമലംഘകരെ പിടികൂടുന്നതിന് ശക്തമായ പരിശോധന ആരംഭിക്കുമെന്നും അധികൃതര്‍ മുന്നറിയിപ്പ് നല്‍കിയിട്ടുണ്ട്.

ഇതിന്റെ ഭാഗമായി ബിസിനസ് മേധാവികളുമായി ചര്‍ച്ച നടത്തി നിയമലംഘകര്‍ ഇല്ലെന്നു ഉറപ്പു വരുത്താന്‍ നിര്‍ദേശം നല്‍കി. ഇവര്‍ ചെയ്യുന്ന ജോലി ഇഖാമയില്‍ രേഖപ്പെടുത്തിയിട്ടുണ്ടെന്ന് സ്ഥാപനങ്ങള്‍ ഉറപ്പുവരുത്തണം. നിലവിലെ പ്രത്യേക പരിശോധനയില്‍ പൊലിസ്, അര്‍ധ സേന വിഭാഗം, ട്രാഫിക് പൊലിസ്, തൊഴില്‍ വകുപ്പ്, വാണിജ്യ മന്ത്രാലയം എന്നിവര്‍ പങ്കടുക്കും. റമദാനിനു ശേഷം അനധികൃത തൊഴിലാളികള്‍ ഉണ്ടാവില്ലെന്ന് ഉറപ്പുവരുത്തേണ്ടത് സുരക്ഷാ ഏജന്‍സികളുടെ ഉത്തരവാദിത്തമാണെന്നും ജവാസാത്ത് മേധാവി പറഞ്ഞു.

അതിനിടെ, ഔട്ട്പാസിന് അപേക്ഷ സമര്‍പ്പിച്ച ഇന്ത്യക്കാരുടെ എണ്ണം 29,219 ആയെന്ന് ഇന്ത്യന്‍ എംബസി അറിയിച്ചു. ഇതില്‍ മലയാളികളുടെ എണ്ണം രണ്ടായിരത്തിന് താഴെയാണ്.
ഇവരില്‍ 28,807 പേര്‍ക്ക് ഔട്ട്പാസ് വിതരണം ചെയ്തതായി ഇന്ത്യന്‍ എംബസി കമ്യൂനിറ്റി വെല്‍ഫെയര്‍ കോണ്‍സുലാര്‍ അനില്‍ നൗട്ടിയാല്‍ അറിയിച്ചു.

അതേ സമയം സീസണ്‍ ആയതിനാല്‍ നാട്ടിലേക്ക് മടങ്ങാന്‍ വിമാന ടിക്കറ്റ് ലഭിക്കാതെ പ്രയാസപ്പെടുകയാണ് എക്‌സിറ്റ് ലഭിച്ചവരില്‍ പലരും. എക്‌സിറ്റ് നേടിയിട്ടും നാട്ടിലേക്ക് പോകാതെ യാത്ര  നീട്ടിവെച്ചവരാണ്  ദുരിതത്തിലായത്. പെരുന്നാളും വേനലവധിയും കാരണം വിമാന യാത്രക്ക് തിരക്ക് വര്‍ധിച്ചതോടെ ടിക്കറ്റ് ലഭിക്കാതെ പലരും പ്രയാസപ്പെടുന്നുണ്ട്. ഇന്ത്യയിലെ പല വിമാനത്താവളങ്ങളിലേക്കും നിലിവില്‍ നാലായിരം റിയാലിനടുത്താണ് ഒരു ഭാഗത്തേക്കുള്ള യാത്രാനിരക്ക്. എന്നാല്‍ നിരവധി തവണ മുന്നറിയിപ്പ് നല്‍കിയതിനാല്‍ തീരുമാനത്തില്‍ മാറ്റമില്ലെന്നാണ് പാസ്‌പോര്‍ട്ട് വിഭാഗം ആവര്‍ത്തിച്ചു വ്യക്തമാക്കുന്നത്.