കൊണ്ടോട്ടി: സംസ്ഥാന ഹജ്ജ് കമ്മറ്റിക്ക് കീഴില്‍ തീര്‍ഥാടനത്തിന് പോകാനുള്ള അപേക്ഷ സ്വീകരണം ഇനി പത്ത് ദിവസം മാത്രം. നവംബര്‍ 10 വരെയാണ് ഹജ്ജ് അപേക്ഷകള്‍ ഓണ്‍ലൈനില്‍ സ്വീകരിക്കുക. മുന്‍വര്‍ഷങ്ങളെ അപേക്ഷിച്ച് ഈ വര്‍ഷം ഹജ്ജ് അപേക്ഷകരില്‍ ഗണ്യമായ കുറവാണുള്ളത്.
ഇന്നലെ വരെ ഹജ്ജിന് 11,140 പേരാണ് അപേക്ഷ നല്‍കിയത്. ഇവരില്‍ നേരിട്ട് അവസരം ലഭിക്കുന്ന 70 വയസിന് മുകളില്‍ പ്രായമുള്ളവരുടെ കാറ്റഗറിയില്‍ 332 പേരാണുള്ളത്. സ്ത്രീകള്‍ മാത്രമുളള കാറ്റഗറിയില്‍ 545 അപേക്ഷകളുമാണ് ലഭിച്ചത്. ഇക്കഴിഞ്ഞ 10 മുതലാണ് ഹജ്ജ് അപേക്ഷ ഓണ്‍ലൈനില്‍ സ്വീകരിച്ചു തുടങ്ങിയത്.