മട്ടാഞ്ചേരി: വൈപ്പിന്‍ ഫോര്‍ട്ട്‌കൊച്ചി ഫെറിയില്‍ സര്‍വ്വീസ് നടത്തുന്ന പാപ്പി ബോട്ട് നിയന്ത്രണം വിട്ട് ജങ്കാറില്‍ ഇടിച്ചത് പരിഭ്രാന്തിക്കിടയാക്കി.ഇന്നലെ വൈകിട്ട് ആറേ മുക്കാലോടെയാണ് പാപ്പി ജങ്കാറില്‍ ഇടിച്ചത്.നിറയെ യാത്രക്കാരുമായി വൈപ്പിനില്‍ നിന്ന് ഫോര്‍ട്ട്‌കൊച്ചിയിലേക്ക് വരികയായിരുന്നു ബോട്ടും ജങ്കാറും.ഫോര്‍ട്ട്‌കൊച്ചിയിലെ ജെട്ടിയില്‍ അടുക്കുന്നതിന് മുമ്പ് നിയന്ത്രണം വിട്ട ബോട്ട് ജങ്കാറില്‍ വന്നിടിക്കുകയായിരുന്നു.
ഇടിയുടെ ആഘാതത്തില്‍ ബോട്ടും ഒപ്പം ജങ്കാറും ആടിയുലഞ്ഞു.യാത്രക്കാര്‍ ബഹളം വെച്ച് കരയുന്ന അവസ്ഥയായി.ജങ്കാര്‍ ജീവനക്കാരുടെ സമയോചിതമായ ഇടപെടലുകള്‍ മൂലം വലിയ അപകടമാണൊഴിവായത്.ഗിയര്‍ തകരാറായതാണ് ബോട്ട് നിയന്ത്രണം വിടാന്‍ കാരണമായതെന്നാണ് വിവരം.ജങ്കാര്‍ ജീവനക്കാര്‍ ചേര്‍ന്ന് ബോട്ട് പിന്നീട് ജെട്ടിയിലടുപ്പിച്ച് യാത്രക്കാരെ ഇറക്കുകയായിരുന്നു.പതിനൊന്ന് പേരുടെ മരണത്തിന് ഇടയാക്കിയ ബോട്ട് ദുരന്തത്തിന് ശേഷം ആലപ്പുഴയിലെ കൈനകരിയില്‍ നിന്നെത്തിച്ചതാണ് പാപ്പി ബോട്ട്.