തിരുവനന്തപുരം: മുഴുവന്‍ ഇതര സംസ്ഥാന തൊഴിലാളികളെയും തൊഴിലും നൈപുണ്യവും വകുപ്പിന്റെ ആവാസ് പദ്ധതിയില്‍ അംഗങ്ങളാക്കുന്നതിന് ഊര്‍ജിത ശ്രമം നടത്തണമെന്ന് മന്ത്രി ടി.പി രാമകൃഷ്ണന്‍ നിര്‍ദേശം നല്‍കി. ആവാസ് പദ്ധതി റിവ്യു, ബില്‍ഡിങ് സെസ്, ഹാന്റ്‌ലൂം സെസ് എന്നിവ സംബന്ധിച്ച് നിയമസഭാ 5 ഡി ഹാളില്‍ നടത്തിയ യോഗത്തില്‍ അധ്യക്ഷം വഹിക്കുകയായിരുന്നു മന്ത്രി.
ആവാസ് പദ്ധതി രജിസ്‌ട്രേഷന്‍ സംബന്ധിച്ച് എവിടെയെങ്കിലും ന്യൂനതകളുണ്ടെങ്കില്‍ അത് തൊഴില്‍ വകുപ്പും പദ്ധതിക്കായി നിയോഗിച്ചിരിക്കുന്ന സ്മാര്‍ട്ട് ഐ.ടി ടീമും സംയുക്തമായി പരിഹരിക്കണം. നിയമത്തിന്റെ പരിരക്ഷ അര്‍ഹതയുള്ളവര്‍ക്ക് നടപ്പാക്കി നല്‍കേണ്ട ഉത്തരവാദിത്തം തൊഴിലും നൈപുണ്യവും വകുപ്പിലെ ഉദ്യോഗസ്ഥര്‍ക്കുണ്ട്. അതിഥി തൊഴിലാളികള്‍ക്കായി തിരുവനന്തപുരത്ത് തമ്പാനൂരില്‍ ആരംഭിച്ചിരിക്കുന്ന ഫെസിലിറ്റേഷന്‍ സെന്ററിന്റെ പ്രവര്‍ത്തന സമയം ദീര്‍ഘിപ്പിക്കണം. ലേബര്‍ കമ്മിഷണറേറ്റ് ഇത് സമയാസമയം പരിശോധിക്കുകയും റിപ്പോര്‍ട്ട് നല്‍കുകയും വേണമെന്നും മന്ത്രി പറഞ്ഞു.
യോഗത്തില്‍ ലേബര്‍ കമ്മിഷണര്‍, അഡീഷനല്‍ ലേബര്‍ കമ്മിഷണര്‍മാര്‍, ജില്ലാ ലേബര്‍ ഓഫിസര്‍മാര്‍ പങ്കെടുത്തു.