ബ്രിസ്ബന്‍: ആസ്‌ത്രേലിയന്‍ പരമ്പരയില്‍ ഇന്ത്യക്ക് തോല്‍വിയോടെ തുടക്കം. പരമ്പരയിലെ ആദ്യ ഇനമായ ടി20 മത്സരത്തില്‍ ആസ്‌ത്രേലിയയോട് നാലു റണ്‍സിനാണ് ഇന്ത്യ അടിയറവ് പറഞ്ഞത്. ഇന്ത്യ ജയിക്കുമെന്ന് തോന്നിച്ചിരുന്നെങ്കിലും അപ്രതീക്ഷിതമായെത്തിയ മഴയാണ് ഇന്ത്യന്‍ വിജയത്തിന് തടസമായത്. ഡക് വര്‍ത്ത് ലൂയിസ് നിയമ പ്രകാരം നാലു റണ്‍സിനായിരുന്നു കംഗാരുപ്പടയുടെ ജയം.
മഴ കാരണം 17 ഓവറാക്കി ചുരുക്കിയ കളിയില്‍ ആദ്യം ബാറ്റ് ചെയ്ത ഓസീസ് നാലു വിക്കറ്റിന് 158 റണ്‍സാണ് നേടിയത്. ഗ്ലെന്‍ മാക്‌സ്‌വെല്‍ (46), ക്രിസ് ലിന്‍ (37) എന്നിവരാണ് ആസ്‌ത്രേലിയക്ക് വേണ്ടി കൂടുതല്‍ റണ്‍സ് നേടിയത്.
മറുപടിയില്‍ ഡക്‌വര്‍ത്ത് ലൂയിസ് നിയമപ്രകാരം ഇന്ത്യയുടെ ലക്ഷ്യം 17 ഓവറില്‍ 174 റണ്‍സായി പുനര്‍ നിശ്ചയിച്ചു. എന്നാല്‍ ഏഴു വിക്കറ്റിന് 169 റണ്‍സെടുക്കാനേ ഇന്ത്യക്കായുള്ളൂ. 42 പന്തില്‍ 10 ബൗണ്ടണ്ടറികളും രണ്ടണ്ടു സിക്‌സറുമടക്കം 76 റണ്‍സെടുത്ത ശിഖര്‍ ധവാനും ഇന്ത്യയെ രക്ഷിക്കാനായില്ല.
ദിനേഷ് കാര്‍ത്തിക് (30), റിഷഭ് പന്ത് (20) എന്നിവര്‍ പൊരുതിനോക്കിയെങ്കിലും ഫലമുണ്ടണ്ടായില്ല. പരമ്പരയിലെ ആദ്യ മത്സരം തന്നെ പരാജയത്തില്‍ കലാശിച്ചത് ഇന്ത്യക്ക് കനത്ത തിരിച്ചടിയായി. രണ്ട് വിക്കറ്റ് നേടിയ കുല്‍ദീപ് യാദവ് മാത്രമാണ് ഇന്ത്യന്‍ ബൗളിങ്ങില്‍ കൂടുതല്‍ വിക്കറ്റുകള്‍ സ്വന്തമാക്കിയത്. ജസ്പ്രീത് ബുംറ, ഖലീല്‍ അഹ്മദ് എന്നിവര്‍ ഓരോ വിക്കറ്റ് വീതവും വീഴ്ത്തി. ആസ്‌ത്രേലിയന്‍ ബൗളിങ് നിരയില്‍ ആദം സാംപ, മാര്‍ക്കസ് സ്റ്റോണിസ് എന്നിവര്‍ രണ്ട് വിക്കറ്റ് വീതം വീഴ്ത്തി. മൂന്ന് മത്സരങ്ങളുള്ള പരമ്പരയില്‍ ആസ്‌ത്രേലിയ 1-0 മുന്നിലാണിപ്പോള്‍. അടുത്ത മത്സരം നാളെ മെല്‍ബണില്‍ നടക്കും.