ചെന്നൈ: ആദ്യ മത്സരത്തില്‍ കേരളാ ബ്ലാസ്റ്റേഴ്‌സിനോട് തോല്‍വി വഴങ്ങിയ കൊല്‍ക്കത്ത തുടര്‍ച്ചയായ രണ്ടാം മത്സരത്തിലും ജയം സ്വന്തമാക്കി.
ഇന്നലെ നടന്ന മത്സരത്തില്‍ ചെന്നൈയിന്‍ എഫ്.സിയുടെ ഹോം ഗ്രൗണ്ടില്‍ നടന്ന മത്സരത്തില്‍ എതിരില്ലാത്ത ഒരു ഗോളിനാണ് കൊല്‍ക്കത്ത ജയിച്ചത്. 48-ാം മിനുട്ടില്‍ ഡേവിഡ് വില്യംസാണ് കൊല്‍ക്കത്തക്ക് വേണ്ടി ഗോള്‍ നേടിയത്. ഗോള്‍ തിരിച്ചടിച്ച് സമനില പിടിക്കുന്നതിനായി ചെന്നൈക്ക് നിരവധി അവസരങ്ങള്‍ ലഭിച്ചെങ്കിലും പന്ത് ലക്ഷ്യത്തിലെത്തിക്കാനായില്ല.
ജയത്തോടെ ആറ് പോയിന്റുമായി കൊല്‍ക്കത്ത പട്ടികയില്‍ ഒന്നാം സ്ഥാനത്താണ്. മൂന്ന് മത്സരം പൂര്‍ത്തിയായപ്പോള്‍ ഒന്നില്‍ പോലും ജയിക്കാത്ത ചെന്നൈ പട്ടികയില്‍ എട്ടാം സ്ഥാനത്ത് നില്‍ക്കുന്നു.
ഇന്ന് നടക്കുന്ന മത്സരത്തില്‍ മുംബൈ സിറ്റി എഫ്.സി ഒഡിഷയെ നേരിടും. ഒറ്റ മത്സരത്തില്‍ പോലും ജയിക്കാത്ത ഒഡിഷ ഇന്ന് ആശ്വാസ ജയത്തിനായിരിക്കും ശ്രമിക്കുക.