വിഴിഞ്ഞം: നബിദിനാഘോഷത്തിന്റെ ഭാഗമായി പരിസ്ഥിതി സംരക്ഷണത്തിന്റെ പ്രാധാന്യം വിളിച്ചോതി നടത്തിയ നബിദിന ഘോഷയാത്ര ശ്രദ്ധേയമായി. വിഴിഞ്ഞം സെന്‍ട്രല്‍ ജുമുആ മസ്ജിദ് മദ്‌റസ വിദ്യാര്‍ഥികളാണ് വേറിട്ട നബിദിന ഘോഷയാത്ര സംഘടിപ്പിച്ചത്.
പരിസ്ഥിതി സംരക്ഷണ സന്ദേശങ്ങള്‍ എഴുതിയ പ്ലക്കാര്‍ഡുകളുമായി ഘോഷയാത്രയില്‍ അണി നിരന്ന കുരുന്നുകള്‍ വഴിമധ്യേ വിഴിഞ്ഞം പൊലിസ് സ്റ്റേഷനില്‍ കയറിയത് നാട്ടുകാര്‍ക്കും പൊലിസുകാര്‍ക്കും കൗതുകമായി.
എസ്.എച്ച്.ഒ ബൈജു എല്‍.എസ് നായര്‍ വിദ്യാര്‍ഥികളെ സ്വീകരിക്കുകയും അവര്‍ കൊണ്ട് വന്ന വൃക്ഷത്തൈ സ്റ്റേഷന്‍ വളപ്പില്‍ നടുകയും ചെയ്തു.
ഇതിനിടെ മറ്റൊരു പരിപാടിയില്‍ പങ്കെടുക്കാനെത്തിയ സിറ്റി ഡെപ്യൂട്ടി പൊലിസ് കമ്മിഷണര്‍ ആര്‍. ആദിത്യ പരിസ്ഥിതി സംരക്ഷണത്തിന്റെ പ്രാധാന്യം വിളിച്ചോതിയെത്തിയ നബിദിനഘോഷയാത്രയെയും വിദ്യാര്‍ഥികളെയും പ്രശംസിക്കുകയും മറ്റൊരു വൃക്ഷത്തൈകൂടി സ്റ്റേഷന്‍ വളപ്പില്‍ നടുകയും ചെയ്തു.
ജമാഅത്ത് പ്രസിഡന്റ് അഷ്‌റഫ് ഹാജി, സെക്രട്ടറി നൗഷാദ്, ചീഫ് ഇമാം അനസ് അല്‍ ഖാസിമി എന്നിവര്‍ നബിദിന ഘോഷയാത്രക്ക് നേതൃത്വം നല്‍കി.