കാട്ടാക്കട: കടം ചോദിച്ച പണം നല്‍കിയില്ലെന്ന് ആരോപിച്ച് പ്രവാസിയെ മൂന്നംഗ സംഘം വീട്ടില്‍ കയറി വെട്ടിപരുക്കേല്‍പ്പിച്ചു. അന്തിയൂര്‍ക്കോണം തേവുപാറ ബിജു ഭവനില്‍ ബിജുവിനെ (30)യാണ് ആക്രമിച്ചത്.
അന്തിയൂര്‍ക്കോണം സ്വദേശികളായ ഹേമന്ദും നന്ദുവും കണ്ടാലറിയുന്ന മറ്റൊരാളും ചേര്‍ന്നാണ് ആക്രമണം നടത്തിയതെന്ന് ബിജു പൊലിസിന് നല്‍കിയ മൊഴിയില്‍ പറയുന്നു. വടിവാളുമായി വീട്ടില്‍ അതിക്രമിച്ചു കടന്ന പ്രതികള്‍ പോര്‍ച്ചില്‍ കിടന്ന കാറിന്റെ മുന്‍ ഗ്ലാസ് തല്ലിത്തകര്‍ത്തു. ശബ്ദം കേട്ട് പുറത്തിറങ്ങിയ ബിജുവിനെ വടിവാള്‍ ഉപയോഗിച്ച് പ്രതികള്‍ ആക്രമിക്കുകയായിരുന്നു.
ഇയാളുടെ മുഖത്തും കൈയ്ക്കും കാലിനും വെട്ടേറ്റു. ഈ സമയം ബിജുവിന്റെ അച്ഛനും അമ്മയും മാത്രമാണ് വീട്ടിലുണ്ടായിരുന്നത്. ഇവരുടെ നിലവിളികേട്ട് നാട്ടുകാര്‍ ഓടിക്കൂടിയതോടെയാണ് അക്രമികള്‍ സ്ഥലം വിട്ടത്. ബിജുവിനെ നാട്ടുകാര്‍ ചേര്‍ന്ന് മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. ഒന്നരമാസം മുന്‍പാണ് ബിജു ഗള്‍ഫില്‍ നിന്ന് അവധിക്ക് നാട്ടിലെത്തിയത്. ഉടന്‍ തിരിച്ചു പോകാനിരിക്കെയാണ് ആക്രമണമുണ്ടായത്. ഹേമന്ദും നന്ദുവും പലപ്രാവശ്യം പണം ആവശ്യപ്പെട്ടിരുന്നെങ്കിലും ബിജു കൊടുക്കാന്‍ കൂട്ടാക്കിയില്ല.
ഇതാണ് ആക്രമണത്തിന് കാരണമെന്ന് മലയിന്‍കീഴ് പൊലിസ് പറഞ്ഞു. പ്രതികള്‍ക്കെതിരേ ജാമ്യമില്ലാ വകുപ്പിട്ട് കേസ് രജിസ്റ്റര്‍ ചെയ്തതായി എസ്.ഐ സുരേഷ് കുമാര്‍ പറഞ്ഞു.