കണ്ണൂര്‍: മലയാളത്തില്‍ നമസ്‌തേയെന്നു പറഞ്ഞു തുടങ്ങിയ ഗവര്‍ണര്‍ പി സദാശിവത്തിന്റെ പ്രസംഗത്തില്‍ മലയാളത്തിനോടുള്ള സ്‌നേഹം മുഴുവന്‍ നിറഞ്ഞുനിന്നു. കണ്ണൂര്‍ സര്‍വകലാശാല ആസ്ഥാനത്തു നടന്ന പ്രതിഭാപുരസ്‌കാര സമര്‍പ്പണത്തിനെത്തിയ ഗവര്‍ണര്‍ മതത്തിന്റെ വേലിക്കെട്ടുകള്‍ തകര്‍ക്കാന്‍ സര്‍വകലാശാലകള്‍ക്കു കഴിയണമെന്നും ഊന്നിപ്പറഞ്ഞു. അവാര്‍ഡ് ജേതാക്കളായ വാണിദാസ് എളയാവൂര്‍, കൈതപ്രം, ഫാ. ഡേവിസ് ചിറമ്മേല്‍, കെ.ആര്‍ മീര, മഞ്ജുവാര്യര്‍ എന്നിവര്‍ സമൂഹത്തിന് നല്‍കിയ സംഭാവനകളെടുത്തുപറഞ്ഞ ഗവര്‍ണര്‍ അവരെ പുകഴ്ത്താനും മറന്നില്ല. മൂന്നു ദശാബ്ദക്കാലമായി തന്റെ പ്രഭാഷണകലയിലൂടെ അനുവാചകര്‍ക്ക് എല്ലാ മതങ്ങളുടെയും സാരാംശം ഒന്നുതന്നെയാണെന്ന സന്ദേശമാണ് വാണിദാസ് നല്‍കുന്നതെന്നു ഗവര്‍ണര്‍പറഞ്ഞു. കെ.ആര്‍ മീര സ്ത്രീമനസിന്റെ ഉള്ളറകള്‍ മറ്റാര്‍ക്കും സാധിക്കാത്ത രീതിയില്‍ എഴുത്തിലേക്കു ചിട്ടപ്പെടുത്തിയ എഴുത്തുകാരിയാണെന്നും ഭാവഗാനങ്ങളിലൂടെ കൈതപ്രത്തിന് ആയിരക്കണക്കിനാളുകളുടെ ഹൃദയത്തില്‍ ഇടം നേടാനായെന്നും അദ്ദേഹം അഭിപ്രായപ്പെട്ടു.
ഫാ. ഡേവിസ് ചിറമേല്‍ തന്റെ സാമൂഹിക പ്രവര്‍ത്തനത്തിലൂടെ യുവജനതയ്ക്കു ഏറെ പ്രചോദനം നല്‍കുന്ന വ്യക്തിയാണെന്നും അസാധാരണ കഴിവും പ്രതിഭയും തെളിയിച്ച മഞ്ജുവാര്യര്‍ 'ഹൗ ഓള്‍ഡ് ആര്‍ യു' എന്ന സിനിമയിലൂടെ കേരളസമൂഹത്തിനോടു പറഞ്ഞുവച്ചത് പ്രായമല്ല ഹൗ ബോള്‍ഡ് ആന്‍ഡ് കോണ്‍ഫിഡന്റ് ആര്‍യൂ എന്നാണെന്നും ഗവര്‍ണര്‍ പറഞ്ഞു. തന്റെ നേട്ടങ്ങള്‍ക്കു പിന്നില്‍ കണ്ണൂരിന്റെ മണ്ണ് നല്‍കിയ ശക്തിയാണെന്നു കൈതപ്രം പറഞ്ഞു.
 ജ്ഞാനസമ്പാദന കേന്ദ്രത്തിനു അപ്പുറമായി വിദ്യാര്‍ഥികള്‍ക്ക് സ്വതന്ത്രമായി ചിന്തിക്കാനുള്ള സ്ഥലമായി സര്‍വകലാശാലകള്‍ മാറണമെന്നു കെ.ആര്‍ മീര പറഞ്ഞു. വിദ്യാര്‍ഥികള്‍ക്ക് ചിന്തിക്കാനും സമരം ചെയ്യാനുമുള്ള സ്വാതന്ത്ര്യം സര്‍വകലാശാലകള്‍ നല്‍കണമെന്നും അവര്‍ പറഞ്ഞു.