ന്യൂയോര്‍ക്ക്: കുല്‍ഭൂഷണ്‍ ജാദവ് കേസില്‍ പാകിസ്താന്‍ വിയന്ന ഉടമ്പടി ലംഘിച്ചെന്ന് അന്താരാഷ്ട്ര നീതിന്യായ കോടതി. യു.എന്‍ പൊതുസഭയിലാണ് കോടതി അധ്യക്ഷന്‍ അബ്ദുല്‍ഖവി അഹ്മദ് യൂസുഫ് ഇക്കാര്യം വ്യക്തമാക്കിയത്.
ഇന്ത്യന്‍ ചാരനെന്നു മുദ്രകുത്തി കുല്‍ഭൂഷണ്‍ ജാദവിന് പാക് പട്ടാള കോടതി വധശിക്ഷ വിധിച്ചിരുന്നു. ഈ വിധി പുനഃപരിശോധിക്കണമെന്നും നയതന്ത്ര സഹായം നല്‍കണമെന്നും ജൂലൈ 17ന് ഹേഗിലെ അന്താരാഷ്ട്ര നീതിന്യായ കോടതി ഉത്തരവിട്ടിരുന്നു.
എന്നാല്‍, ഉത്തരവ് നടപ്പാക്കാന്‍ ശ്രമിച്ചില്ലെന്നു മാത്രമല്ല, പലപ്പോഴും പാക് അധികൃതര്‍ ധിക്കാരപരമായി പെരുമാറിയെന്നും അദ്ദേഹം വ്യക്തമാക്കി.
വിയന്ന ഉടമ്പടിയിലെ ആര്‍ട്ടിക്കിള്‍ 36 പാകിസ്താന്‍ ലംഘിച്ചെന്നാണ് കോടതിയുടെ കണ്ടെത്തല്‍. ചാരവൃത്തി ആരോപിക്കപ്പെടുന്ന കേസുകളും ഈ ആര്‍ട്ടിക്കിളിന്റെ പരിധിയില്‍ വരുന്നതിനാല്‍ നയതന്ത്ര സഹായം നല്‍കുന്നതില്‍നിന്നു പാകിസ്താന് ഒഴിഞ്ഞുമാറാന്‍ കഴിയില്ലെന്നും കോടതി ചെയര്‍മാന്‍ പറഞ്ഞു.
നേരത്തെ, ജാദവ് ചാരനാണെന്നതിനു തെളിവില്ലെന്ന നിലപാടെടുത്ത കോടതി, പാക് പട്ടാള കോടതിയുടെ വിധി റദ്ദാക്കുകയോ ജാദവിനെ വിട്ടയയ്ക്കാന്‍ നിര്‍ദേശിക്കുകയോ ചെയ്തിരുന്നില്ല. എന്നാല്‍, നിയമപ്രകാരമുള്ള കച്ചവടത്തിനെത്തിയ ജാദവിനെ പാകിസ്താന്‍ തട്ടിക്കൊണ്ടുപോകുകയായിരുന്നെന്നാണ് ഇന്ത്യയുടെ വാദം.