തിരുവനന്തപുരം: ലോകത്തെമ്പാടുമുള്ള മലയാളികള്‍ക്ക് മുഖ്യമന്ത്രി പിണറായി വിജയന്‍ ആഹ്ലാദ പൂര്‍ണമായ ഈദുല്‍ ഫിത്വര്‍ ആശംസിച്ചു. ഒരു മാസത്തെ റമദാന്‍ വ്രതത്തിനു ശേഷം വന്നെത്തുന്ന ഈദുല്‍ ഫിത്വര്‍ മനുഷ്യ സ്‌നേഹത്തിന്റെയും സാഹോദര്യത്തിന്റെയും ഐക്യത്തിന്റെയും സഹാനുഭൂതിയുടെയും മഹത്തായ സന്ദേശങ്ങളാണ് നല്‍കുന്നത്. മനുഷ്യര്‍ പരസ്പരം വിശ്വസിക്കുകയും സ്‌നേഹിക്കുകയും സഹായിക്കുകയും ചെയ്യുന്ന സാഹചര്യത്തിലേക്ക് മുന്നേറാന്‍ ഈദിന്റെ സന്ദേശം ഉപകരിക്കട്ടെ എന്ന് മുഖ്യമന്ത്രി ആശംസിച്ചു.

പി.കെ കുഞ്ഞാലിക്കുട്ടി
മലപ്പുറം: മുസ്‌ലിം ലീഗ് ദേശീയ ജനറല്‍ സെക്രട്ടറി പി.കെ കുഞ്ഞാലിക്കുട്ടി ലോകമെമ്പാടുമുള്ള മലയാളികള്‍ക്ക് ഈദ് ആശംസ നേര്‍ന്നു.
ത്യാഗത്തിന്റെയും സാഹോദര്യത്തിന്റെയും ഓര്‍മപ്പെടുത്തലാണ് ഈദുല്‍ ഫിത്വര്‍ നല്‍കുന്നത്. ദലിതരും ന്യൂനപക്ഷങ്ങളുമടുങ്ങുന്ന പിന്നോക്കവിഭാഗം കടുത്ത വിവേചനവും അവഗണനയും നേരിടുന്ന സന്ദര്‍ഭത്തിലാണ് ഇത്തവണ പെരുന്നാള്‍ വരുന്നത്.
ബീഫ് കഴിച്ചെന്നാരോപിച്ച് ജുനൈദ് ഖാനെന്ന 16കാരനെ തല്ലിക്കൊന്ന വേദനിപ്പിക്കുന്ന സംഭവം നടന്നത് കഴിഞ്ഞ ദിവസമാണ്. മനുഷ്യരെ ജാതിയുടെയും മതത്തിന്റെയും പേരില്‍ ഭിന്നിപ്പിക്കുന്നവരാണ് ഈ അക്രമങ്ങള്‍ക്ക് പിന്നില്‍. മതങ്ങള്‍ക്കും ജാതിക്കുമപ്പുറം മനുഷ്യന്റെ ഐക്യത്തിലൂടെയും പങ്കുവയ്ക്കലുകളിലൂടെയും ഭിന്നിപ്പിന്റെ ശക്തികള്‍ക്ക് മറുപടി നല്‍കാന്‍ കൂടി ഈ പെരുന്നാളിന് കഴിയണമെന്ന് അദ്ദേഹം ആശംസിച്ചു.

എം.എം. ഹസന്‍
തിരുവനന്തപുരം: എല്ലാ മലയാളികള്‍ക്കും കെ.പി.സി.സി പ്രസിഡന്റ് എം.എം ഹസന്‍ ഈദുല്‍ ഫിത്വര്‍ ആശംസകള്‍ നേര്‍ന്നു. വ്രതശുദ്ധിയിലൂടെ കൈവരിച്ച ആത്മീയ ചൈതന്യം മാനവ സൗഹൃദത്തിനും സാമൂഹ്യനന്മക്കുമായി വിനിയോഗിക്കാന്‍ കഴിയട്ടേയെന്നും അദ്ദേഹം ആശംസാസന്ദേശത്തില്‍ പറഞ്ഞു.