കൊല്‍ക്കത്ത: കൊല്‍ക്കത്ത ഈഡന്‍ ഗാര്‍ഡന്‍സില്‍ ആതിഥേയരായ ബംഗാളിനെ എറിഞ്ഞുവീഴ്ത്തി കേരളത്തിന് സ്വപ്‌നവിജയം. കളി തീരാന്‍ ഒരു ദിവസം ബാക്കി നില്‍ക്കെ ബംഗാളിനെ കേരളം ഒന്‍പത് വിക്കറ്റിന് തകര്‍ത്തു. രണ്ടാം ഇന്നിങ്‌സില്‍ ബംഗാളിനെ 184 റണ്‍സിന് ഓള്‍ഔട്ടാക്കിയ കേരളം, 41 റണ്‍സിന്റ വിജയലക്ഷ്യം ഒരു വിക്കറ്റ് നഷ്ടത്തില്‍ മറികടന്നു.

രണ്ടാം ഇന്നിംഗ്‌സില്‍ ജലജ് സ്‌കസേനയുടെ വിക്കറ്റാണ് കേരളത്തിന് നഷ്ടമായത്. 16 റണ്‍സുമായി അരുണ്‍ കാര്‍ത്തിക്കും രണ്ട് റണ്ണുമായി രോഹന്‍ പ്രേമും പുറത്താകാതെ നിന്നു. സന്ദീപ് വാരിയരും ബേസില്‍ തമ്പിയും മല്‍സരത്തിലാകെ ഏഴു വിക്കറ്റ് വീതം വീഴ്ത്തി.

62 റണ്‍സെടുത്ത ക്യാപ്റ്റന്‍ മനോജ് തിവാരിക്ക് മാത്രമാണ് ബംഗാളിന്റെ ബാറ്റിങ് നിരയില്‍ തിളങ്ങാനായത്.

രണ്ട് കളികളില്‍ നിന്ന് ഏഴ് പോയിന്റുള്ള കേരളം ഇപ്പോള്‍ ഗ്രൂപ്പ് ബിയില്‍ ഒന്നാമതാണ്. കളി തോറ്റെങ്കിലും ആറു പോയിന്റുള്ള ബംഗാളാണ് രണ്ടാമത്.