പനജി: ചുവപ്പു കാര്‍ഡുകള്‍ പുറത്തെടുക്കേണ്ടി വന്ന പരുക്കന്‍ പോരാട്ടത്തില്‍ ഗോവയും കടന്ന് ബംഗളൂരുവിന്റെ കുതിപ്പ്. 2-1 ന് എഫ്.സി ഗോവയെ കീഴടക്കിയാണ് ബംഗളൂരു എഫ്.സി തുടര്‍ച്ചയായ നാലാം ജയം കുറിച്ചത്. ഐ.എസ്.എല്ലില്‍ രണ്ടാം സീസണ്‍ മാത്രം കളിക്കുന്ന ബംഗളൂരു തോല്‍വി അറിയാതെയാണ് മുന്നേറുന്നത്.
34 ാം മിനുട്ടില്‍ രാഹുല്‍ ബെക്കേയും 77 ാം മിനുട്ടില്‍ സുനില്‍ ഛേത്രിയുമാണ് ബംഗളൂരുവിനായി ഗോളുകള്‍ നേടിയത്. 72 ാം മിനുട്ടില്‍ ബ്രണ്ടന്‍ ഫെര്‍ണാണ്ടസ് ഗോവയുടെ ആശ്വാസഗോള്‍ നേടി. തുടര്‍ച്ചയായി രണ്ടു വിജയങ്ങള്‍ക്കു ശേഷമാണ് ഗോവ സ്വന്തം തട്ടകത്തില്‍ തോല്‍ക്കുന്നത്.
34 ാം മിനുട്ടില്‍ കോര്‍ണറില്‍നിന്ന് സിസ്‌കോയുടെ വോളിയാണ് ബംഗളൂരുവിന്റെ ആദ്യഗോളിന് വഴിയൊരുക്കിയത്. പന്ത് കിട്ടിയ രാഹുല്‍ ബെക്കേയുടെ ഇടന്‍കാലനടി ഗോവന്‍ വലകുലുക്കി. ഗോവയുടെയും ബംഗളൂരുവിന്റെയും ഓരോ താരങ്ങള്‍ ചുവപ്പ് കാര്‍ഡ് കണ്ടതോടെ പത്തു പേരുമായാണ് കളിച്ചത്. എഫ്.സി ഗോവയുടെ പ്രതിരോധതാരം മുഹമ്മദ് അലിയ്ക്കും ബംഗളൂരുവിന്റെ മധ്യനിരക്കാരന്‍ ഡിമാസ് ഡെല്‍ഗാഡോയ്ക്കുമാണ് ചുവപ്പ് കാര്‍ഡ് കിട്ടിയത്. ബംഗളൂരുവിനോട് തോറ്റെങ്കിലും പോയിന്റ് പട്ടികയില്‍ ഗോവ തന്നെയാണ് മുന്നില്‍. ഇരുടീമുകള്‍ക്കും 16 പോയിന്റ് വീതമുണ്ടെങ്കിലും ഗോള്‍ ശരാശരിയിലാണ് ബംഗളൂരുവിനെ രണ്ടാം സ്ഥാനത്താക്കി ഗോവ ഒന്നാമതെത്തിയത്.