റിയാദ്: ലോകമെമ്പാടുമുള്ള അഭയാര്‍ഥികളുടെ ദുരിതമകറ്റുന്നതിന് സഊദി അറേബ്യ 1800 കോടി ഡോളര്‍ സഹായം നല്‍കിയതായി സഊദി അറേബ്യ. 50,000 ലേറെ പേര്‍ക്കും അവരുടെ കുടുംബാംഗങ്ങള്‍ക്കും പൗരത്വം നല്‍കിയതായും സഊദി അറേബ്യ വ്യക്തമാക്കി. യു.എന്‍ ഹൈക്കമ്മീഷണര്‍ ഫോര്‍ റെഫ്യൂജീസ് റിപ്പോര്‍ട്ടില്‍ ഐക്യരാഷ്ട്രസഭ ജനറല്‍ അസംബ്ലിയില്‍ നടന്ന ചര്‍ച്ചയിലാണ് സൗദി തേഡ് സെക്രട്ടറി ഫൈസല്‍ ബിന്‍ ഫഹദ് ബിന്‍ ജുദൈദ് ഇക്കാര്യം വെളിപ്പെടുത്തിയത്. എട്ടു ലക്ഷത്തിലേറെ അഭയാര്‍ഥികള്‍ക്ക് പിഴയും ഫീസുകളും കൂടാതെ നിയമാനുസൃത തിരിച്ചറിയല്‍ രേഖകള്‍ നല്‍കിയതായും സ്വതന്ത്രമായി സഞ്ചരിക്കുന്നതിനും ജോലി ചെയ്യുന്നതിനും വിദ്യാഭ്യാസവും ആരോഗ്യ പരിചരണങ്ങളും നേടുന്നതിനും സഊദി അവര്‍ക്ക് അവസരമൊരുക്കിയതായും അദ്ദേഹം കൂട്ടിച്ചേര്‍ത്തു.
സംഘര്‍ഷങ്ങളും യുദ്ധങ്ങളും പ്രകൃതി ദുരന്തങ്ങളും കാരണമായി ദുരിതമനുഭവിക്കുന്നവരുടെ കണ്ണീരൊപ്പുന്നതിന് വന്‍ സഹായങ്ങളാണ് സഊദി വെച്ചത്. സിറിയന്‍ അഭയാര്‍ഥികള്‍ക്ക്16 കോടിയിലേറെ ഡോളറിന്റെ സഹായാവും ജോര്‍ദാന്‍, ലെബനോന്‍, തുര്‍ക്കി, ഗ്രീസ്, എന്നിവിടങ്ങളിലെ സിറിയന്‍ അഭയാര്‍ഥികള്‍ക്കിടയില്‍ കിംഗ് സല്‍മാന്‍ റിലീഫ് ആന്റ് ഹ്യുമാനിറ്റേറിയന്‍ എയിഡ് സെന്റര്‍ വഴി 129 റിലീഫ് പദ്ധതികളും സോമാലി, ജിബൂത്തി എന്നിവിടങ്ങള്‍ സിറിയന്‍ മറ്റു രാജ്യങ്ങളില്‍ കഴിയുന്ന യെമന്‍ അഭയാര്‍ഥികള്‍ക്കിടയില്‍ 12 റിലീഫ് പദ്ധതികളും നടപ്പാക്കുന്നതായും സഊദി അറേബ്യ വെളിപ്പെടുത്തി.
റോഹിന്‍ഗ്യന്‍ അഭയാര്‍ഥികള്‍ക്ക് 3.8 കോടിയിലേറെ ഡോളര്‍, ഫലസ്തീന്‍ അഭയാര്‍ഥികള്‍ക്ക് 90 കോടിയിലേറെ ഡോളര്‍ എന്നിവ നല്‍കിയിട്ടുണ്ട്.
നിലവില്‍ 10,74,000 അഭയാര്‍ഥികളാണ് സഊദിയില്‍ കഴിയുന്നത്. ഇവരെ അഭയാര്‍ഥികളായല്ല, എല്ലാ അവകാശങ്ങളും ലഭിക്കുന്ന സന്ദര്‍ശകര്‍ എന്നോണമാണ് രാജ്യം കാണുന്നത്. ഇവര്‍ക്ക് സൗജന്യ വിദ്യാഭ്യാസവും ആരോഗ്യ പരിചരണങ്ങളും ലഭിക്കുന്നു. അഭയാര്‍ഥി ക്യാമ്പുകളിലല്ല ഇവര്‍ കഴിയുന്നത്. വീടുകളിലും ഉയര്‍ന്ന ഗുണമേന്മയുള്ള പാര്‍പ്പിട കേന്ദ്രങ്ങളിലുമാണ്. ഇവര്‍ക്ക് 1600 കോടിയിലേറെ ഡോളറിന്റെ സഹായം ഇതിനകം സഊദി അറേബ്യ നല്‍കിയിട്ടുണ്ടെന്നും ഫൈസല്‍ ബിന്‍ ഫഹദ് ബിന്‍ ജുദൈദ് പറഞ്ഞു.