പഞ്ച്കുള: ഹരിയാനയിലെ പഞ്ച്കുളയില്‍ വിവാദ ആള്‍ദൈവം ഗുര്‍മിത് റാംറഹീം സിങ്ങിന്റെ മോചനമാവശ്യപ്പെട്ട് കലാപം അഴിച്ചുവിട്ടതിനെത്തുടര്‍ന്ന് അദ്ദേഹത്തിന്റെ വളര്‍ത്തു മകള്‍ ഹണിപ്രീതിനെതിരെ ചുമത്തിയ രാജ്യദ്രോഹക്കേസ് പിന്‍വലിച്ചു. ബലാല്‍സംഗക്കേസില്‍ 2017ല്‍ ദേര സച്ചാ സൗദ തലവനായ ഗുര്‍മീതിനെ കോടതി 20 വര്‍ഷം കഠിനതടവിന് ശിക്ഷിച്ചതിന് പിന്നാലെയാണ് പഞ്ച്കുളയില്‍ ഹണിപ്രീതും അനുയായികളും കലാപം അഴിച്ചുവിട്ടത്. കലാപവുമായി ബന്ധപ്പെട്ട് ഹണിപ്രീത് ഉള്‍പ്പെടെ 35 പേര്‍ക്കെതിരെയാണ് രാജ്യദ്രോഹം ഉള്‍പ്പെടെയുള്ള കടുത്ത വകുപ്പുകള്‍ ഉപയോഗിച്ച് കേസെടുത്തത്.
എന്നാല്‍, രാജ്യദ്രോഹം റദ്ദാക്കിയെങ്കിലും മറ്റുവകുപ്പുകള്‍ നിലനില്‍ക്കുമെന്ന് അഡീഷനല്‍ സെഷന്‍സ് ജഡ്ജി സഞ്ജയ് സന്ധീര്‍ വ്യക്തമാക്കി. രാജ്യദ്രോഹവുമായി ബന്ധപ്പെട്ട ഐ.പി.സി 121 വകുപ്പ് (രാജ്യത്തിനെതിരെ യുദ്ധംചെയ്യല്‍) 121എ എന്നിവ റദ്ദാക്കുന്നുവെന്നു കോടതി പറഞ്ഞു. ക്രിമിനല്‍ ഗൂഢാലോചന, നിയമവിരുദ്ധമായി സംഘംചേരല്‍ തുടങ്ങിയ വകുപ്പുകള്‍ പ്രകാരം ഇവരെ വിചാരണ ചെയ്യുമെന്നും കോടതി അറിയിച്ചു. നിലവില്‍ അംബാല ജയിലില്‍ കഴിയുന്ന ഹണിപ്രീത് വിഡിയോ കോണ്‍ഫറന്‍സിങ് സംവിധാനം വഴിയാണ് വിചാരണയില്‍ പങ്കെടുത്തത്. ഈമാസം ആറിന് കേസ് വീണ്ടും പരിഗണിക്കും.
കലാപത്തില്‍ 30ലധികം പേര്‍ മരിക്കുകയും 200ഓളം പേര്‍ക്കു പരുക്കേല്‍ക്കുകയും ചെയ്തിരുന്നു. കോടികളുടെ നാശനഷ്ടവും ഇവര്‍ വരുത്തിവച്ചിരുന്നു. കേസിലെ മുഖ്യപ്രതിയാണ് ഹണിപ്രീത്. 2009 മുതല്‍ ഗുര്‍മീതിന്റെ വലംകൈയായി കൂടെയുള്ള ഹണിപ്രീത് തന്റെ വളര്‍ത്തു മകളെന്നാണ് അദ്ദേഹം അവകാശപ്പെടുന്നത്.