തിരുവനന്തപുരം: വാളയാര്‍ സംഭവത്തില്‍ സംസ്ഥാന വനിതാ കമ്മിഷന്റെ നിഷ്‌ക്രിയത്വത്തിനെതിരേ കെ.എസ്.യു തിരുവനന്തപുരം ജില്ലാ കമ്മിറ്റിയുടെ നേതൃത്വത്തില്‍ വനിതാ കമ്മിഷന്‍ ഓഫിസ് ഉപരോധിച്ചു.
ഉച്ചയ്ക്ക് ഒന്നരയോടെ പ്ലാമൂടുള്ള സംസ്ഥാന വനിതാ കമ്മിഷന്‍ ആസ്ഥാനത്തേക്ക് എം.സി ജോസഫൈന്‍ രാജി വയ്ക്കണമെന്നാവശ്യപ്പെട്ട് പ്രകടനമായാണ് കെ.എസ്.യു പ്രവര്‍ത്തകര്‍ എത്തിയത്. തുടര്‍ന്ന് കമ്മിഷന്‍ ഓഫിസിന് മുന്നില്‍ 'എ.കെ.ജി സെന്റര്‍ : ഇവിടെ പ്രതികള്‍ക്ക് സംരക്ഷണം' എന്ന ബോര്‍ഡു വയ്ക്കുകയും മുദ്രാവാക്യം വിളികളോടെ അവിടെ കുത്തിയിരുന്ന് പ്രതിഷേധിക്കുകയും ചെയ്തു. പ്രതിഷേധം തുടര്‍ന്നതോടെ നേതാക്കളെ അറസ്റ്റുചെയ്ത് നീക്കാന്‍ പൊലിസ് ശ്രമം നടത്തി. ഇതേതുടര്‍ന്ന് ചെറിയ വാക്കേറ്റവും ഉന്തുംതള്ളുമുണ്ടായി. ഒരു മണിക്കൂറോളം തുടര്‍ന്ന ഉപരോധസമരത്തിനൊടുവില്‍ പ്രതിഷേധിച്ച മുഴുവന്‍ പേരെയും പൊലിസ് അറസ്റ്റ് ചെയ്ത് നീക്കി.
ഉപരോധ സമരത്തിന് ജില്ലാ പ്രസിഡന്റ് സെയ്താലി കായ്പ്പാടി, സംസ്ഥാന സെക്രട്ടറി ബാഹുല്‍ കൃഷ്ണ, ജില്ലാ ഭാരവാഹികളായ അജിന്‍ ദേവ്, സജീന ബി.സജന്‍, പ്രിയങ്ക ഫിലിപ്പ്, കൃഷ്ണകാന്ത്, എസ്.കെ അരുണ്‍, രാഗേഷ്, പ്രധുല്‍, അഖില്‍, ജ്യോതിഷ്, ആഷിക്ക്, യൂത്ത് കോണ്‍ഗ്രസ് നേതാക്കളായ അബിഷ് ബി.ആനന്ദ്, എ.പി വിഷ്ണു നേതൃത്വം നല്‍കി.