വടകര: ലഹരിക്കെതിരേയുള്ള സന്ദേശവുമായി എന്‍.എസ്.എസ് വളണ്ടിയര്‍മാരുടെ പ്രകടനം ശ്രദ്ധേയമായി.
റവന്യു ജില്ലാ കലോത്സവത്തിലെ വേദിയായ വടകര ടൗണ്‍ ഹാളിനു സമീപത്താണ് ലഹരിക്കെതിരേയുള്ള സ്റ്റാള്‍ പ്രവര്‍ത്തിച്ചത്. പുത്തൂര്‍ ഗവ. ഹയര്‍ സെക്കന്‍ഡറി, എം.യു.എം ഹയര്‍ സെക്കണ്ടന്‍ഡറി എന്നീ സ്‌കൂളുകളിലെ എന്‍.എസ്.എസ് വളണ്ടിയര്‍മാര്‍ സംയുക്തമായാണു പുകയില, ലഹരി, മദ്യവിരുദ്ധ പ്രദര്‍ശനവും സിഗരറ്റിലെ നിക്കോട്ടിന്റെ അളവു കണ്ടെത്തുന്ന പരീക്ഷണവും നടത്തിയത്.
പുത്തൂര്‍ ഹയര്‍ സെക്കന്‍ഡറി സ്‌കൂളിലെ എന്‍.എസ്.എസ് വളണ്ടിയറായ അയ്മന്‍ റിയാസിന്റെ നേതൃത്വത്തിലാണ് സിഗരറ്റ് ഉല്‍പാദിപ്പിക്കുന്ന നിക്കോട്ടിന്റെ വ്യാപ്തി വാട്ടര്‍ബോട്ടിലില്‍ സ്വരൂപിച്ച പുക ടിഷ്യൂ പേപ്പറിലേക്ക് പകര്‍ത്തി കാണികള്‍ക്ക് മുന്‍പില്‍ പ്രദര്‍ശിപ്പിച്ചത്.
പ്രദര്‍ശനം വടകര സര്‍ക്കിള്‍ എക്‌സൈസ് ഇന്‍സ്‌പെക്ടര്‍ അനില്‍ കുമാര്‍ ഉദ്ഘാടനം ചെയ്തു. എന്‍.എസ്.എസ് വടകര ക്ലസ്റ്റര്‍ കോഡിനേറ്റര്‍ അബ്ദുസ്സമദ്, പ്രോഗ്രാം ഓഫിസര്‍മാരായ അബ്ദുല്‍ സമീര്‍, അദീബ്, വളണ്ടിയര്‍മാരായ ആയുഷ്, തേജസ്, നാജിയ, ഗോപിക പ്രമോദ് സംസാരിച്ചു.