റിയാദ്: സമസ്ത ഇസ്‌ലാമിക് സെന്റര്‍ നടത്തിയ ഹദീസ് ക്യാമ്പയിന്‍ ദേശീയ മത്സര വിജയികളെ പ്രഖ്യാപിച്ചു. ദേശീയ പ്രസിഡന്റ് സയ്യിദ് ഉബൈദുല്ല തങ്ങള്‍ അല്‍ ഹൈദ്രൂസി ആണ് മൂന്ന് മാസം നീണ്ടു നിന്ന ഹദീസ് ക്യാമ്പയിന്‍ വിജയികളെ പ്രഖ്യാപിച്ചത്. ആദ്യ ഒന്നും, മൂന്നും റാങ്കുകള്‍ ജിദ്ദ സെന്‍ട്രല്‍ കമ്മിറ്റിയും രാണ്ടാം റാങ്ക് ദമാം സെന്‍ട്രല്‍ കമ്മിറ്റിയുമാണ് അര്‍ഹരായത്. ജിദ്ദയിലെ അബ്ദുല്‍ ജലീല്‍ വടകര ഒന്നാം റാങ്കും സ്ഥാനം സുമയ്യ നജീബ് (ദമാം) രണ്ടാം റാങ്കും മുബഷിറ ഇ (ഉമ്മു ഹാമിദ) ജിദ്ദ മൂന്നാം റാങ്കും കരസ്ഥമാക്കി.

ഇമാം ബുഖാരിയുടെ അതുല്യവും അമൂല്യവുമായ അദബുല്‍ മുഫ്‌റദ് എന്ന കൃതിയെ അടിസ്ഥാനമാക്കിയാണ് ഹദീസ് ക്യാമ്പയിന്‍ നടത്തിയത്. യൂണിറ്റ് തലങ്ങളില്‍ നിന്നും വിജയിച്ചവരെ സെന്‍ട്രല്‍ കമ്മിറ്റി തലങ്ങളില്‍ പങ്കെടുപ്പിച്ചും അവിടെ നിന്നും വിജയിച്ചവര്‍ പ്രവിശ്യ തലത്തില്‍ നടത്തിയ പരീക്ഷകളിലും പങ്കടുത്തിരുന്നു. പ്രവിശ്യ തലങ്ങളിലെ വിജയികളാണ് ദേശീയ തല മത്സരത്തില്‍ മാറ്റുരച്ചത്.

ഹദീസ് ക്യാമ്പയിന്‍ ഭാഗമായി പുസ്തക വിതരണം, ഹദീസ് വിശകലനങ്ങള്‍, ഓണ്‍ലൈന്‍ ക്‌ളാസുകള്‍ എന്നിവയടക്കം വിവിധ പരിപാടികള്‍ നടന്നിരുന്നു. പ്രവാചക വചനങ്ങള്‍ സമൂഹത്തിലേക്ക് എത്തിക്കുന്നതില്‍ തീര്‍ത്തും നിര്‍ണ്ണായക പങ്കാണ് ഹദീസ് ക്യാമ്പയിന്‍ വഹിച്ചത്.