തൊടുപുഴ:  സ്‌കൂള്‍- കോളജ് വിദ്യാര്‍ഥികള്‍ക്ക് കഞ്ചാവ് വില്‍പന നടത്തിവന്ന അഞ്ചുപേര്‍ 85 ഗ്രാം കഞ്ചാവുമായി കരിമണ്ണൂരില്‍ എക്‌സൈസിന്റെ പിടിയിലായി.
കരിമണ്ണൂര്‍ സ്വദേശികളായ ഷാനവാസ് (ഷാനു-22), ഹാരിസ് നാസര്‍(22), നിഖില്‍ രവി (18), വിജേഷ് വിജയന്‍ (22), മുഹമ്മദ് ജുനൈദ് (18) എന്നിവരാണ് അറസ്റ്റിലായത്. ഇവരില്‍ നിന്ന് 85 ഗ്രാം കഞ്ചാവും കണ്ടെടുത്തു. പിടിയിലായവരില്‍ ചിലര്‍ കഞ്ചാവുകേസുകളില്‍ ഉള്‍പ്പെട്ട് ഒഴിവില്‍ കഴിയുന്നവരാണ്.
സംഘത്തിലെ ഒരാള്‍ കരിമണ്ണൂര്‍ സെന്റ് മേരീസ് ആശുപത്രിയില്‍ ചികിത്സയിലുണ്ടായിരുന്നു. ഇയാളെ ആശുപത്രിയില്‍ നിന്ന് ഡിസ്ചാര്‍ജ് ചെയ്ത് കൊണ്ടുപോകാന്‍ മറ്റുള്ളവര്‍ എത്തിയപ്പോഴാണ് എക്‌സൈസിന്റെ പിടിയിലായത്. തൊടുപുഴ എക്‌സൈസ് സര്‍ക്കിള്‍, റേഞ്ച് ഓഫീസുകള്‍ സംയുക്തനീക്കം നടത്തിയാണ് ഇവരെ അറസ്റ്റ് ചെയ്തത്.
ജുനൈദ് ഒഴികെ മറ്റുള്ളവര്‍ക്കെതിരെ രണ്ട് കഞ്ചാവ് കേസുകള്‍ നിലവിലുണ്ട്. തൊടുപുഴ ഭാഗങ്ങളില്‍ കൗമാരക്കാര്‍ക്ക് കഞ്ചാവ് വില്‍ക്കുന്ന സംഘത്തിലെ മുഖ്യകണ്ണികളാണ് ഇവരെന്ന് എക്‌സൈസ് അറിയിച്ചു.
തൊടുപുഴ എക്‌സൈസ് സര്‍ക്കിള്‍ ഇന്‍സ്‌പെക്ടര്‍ ഷാജി ജോര്‍ജ്, അസിസ്റ്റന്റ് എക്‌സൈസ് ഇന്‍സ്‌പെക്ടര്‍ ഫ്രാന്‍സിസ് ജോര്‍ജ്, പ്രിവന്റീവ് ഓഫീസര്‍മാരായ രാജേഷ് ചന്ദ്രന്‍, ആര്‍ പ്രകാശ്, സിവില്‍ എക്‌സൈസ് ഓഫീസര്‍മാരായ ദേവദാസ് പ്രതീഷ്, അനീഷ്‌കുമാര്‍,  രാജേഷ് സുകുമാരന്‍, സിബിന്‍, അഗസ്റ്റ്യന്‍ ജോസഫ്, സാബു ജോസഫ് എന്നിവര്‍ ചേര്‍ന്നാണ് പ്രതികളെ അറസ്റ്റ് ചെയ്തത്.