മട്ടാഞ്ചേരി: ഇടക്കൊച്ചിയില്‍ വസ്ത്ര വ്യാപാരിയായ പാമ്പായിമൂലയില്‍ ബാലുവെന്ന ബാലസുബ്രഹ്മണ്യത്തെ  വെട്ടി കൊലപ്പെടുത്താന്‍ ശ്രമിച്ച സംഭവത്തില്‍ അഞ്ച് പേര്‍ കൂടി പൊലിസ് പിടിയിലായി.
കൃത്യം നടത്തിയ സംഘത്തിലെ മൂന്ന് പേര്‍ ഉള്‍പ്പെടെയാണ് അഞ്ച് പേര്‍ പിടിയിലായത്. ഏലൂര്‍ മഞ്ഞുമ്മല്‍ ലോഡ്ജ് സ്റ്റോപ്പിന് സമീപം കൂനംപ്പറമ്പ് വീട്ടില്‍ ഇപ്പോള്‍ ചേരാനല്ലൂര്‍ മുണ്ടപ്പാടം റോഡില്‍ വാടകയ്ക്ക് താമസിക്കുന്ന ആശാന്‍ എന്ന് വിളിക്കുന്ന രാധാകൃഷ്ണന്‍(36), ചേരാനല്ലൂര്‍ എടേക്കുന്നം ടെമ്പിള്‍ റോഡില്‍ മുല്ലയ്ക്കാപ്പിള്ളി വീട്ടില്‍ ഉണ്ണി എന്ന് വിളിക്കുന്ന ഷിജിത്ത്(35), ഏലൂര്‍ മഞ്ഞുമ്മല്‍ മാടപ്പാട്ട് റോഡില്‍ മേഘാ വാട്ടര്‍ ടാങ്ക് കമ്പനിക്ക് സമീപം ആഞ്ഞിലിക്കാട്ട് വീട്ടില്‍ വിനു(28), മട്ടാഞ്ചേരി കപ്പലണ്ടിമുക്ക് മമ്മുസുര്‍ക്കാ പള്ളിക്ക് സമീപം മൊഹ്‌സിന്‍(27), ഫോര്‍ട്ട്‌കൊച്ചി വെളി ഓടത്ത ലൈനില്‍ പുത്തന്‍ പാടത്ത് വീട്ടില്‍ ഫ്‌ളോറി(61) എന്നിവരെയാണ് മട്ടാഞ്ചേരി അസിസ്റ്റന്റ് കമ്മിഷണര്‍ എസ്.വിജയന്‍, പള്ളുരുത്തി സര്‍ക്കിള്‍ ഇന്‍സ്‌പെക്ടര്‍ കെ.ജി അനീഷിന്റെ നേതൃത്വത്തില്‍ അറസ്റ്റ് ചെയ്തത്. ഇവരില്‍ രാധാകൃഷ്ണന്‍, ഷിജിത്ത്, വിനു എന്നിവര്‍ കൃത്യം നടത്തിയ സംഘത്തില്‍പ്പെട്ടവരാണ്.
ഇവര്‍ ഒളിവില്‍ കഴിയുകയായിരുന്ന മൈസൂരുവിലെ കോഴി ഫാമില്‍ നിന്നാണ് പൊലിസ് അറസ്റ്റ് ചെയ്തത്. പ്രതികളുടെ കൊച്ചിയിലെ സുഹൃത്തുക്കളെ കേന്ദ്രീകരിച്ച് നടത്തിയ അന്വേഷണത്തിലാണ് ഇവര്‍ മൂന്ന് പേരും മൈസൂരുവിലുണ്ടെന്ന് പൊലിസ് മനസ്സിലാക്കിയത്.
നേരത്തേ ഈ കേസില്‍ അറസ്റ്റിലായ ജിനാസ്, ബിജിന്‍ എന്നിവര്‍ ഇപ്പോള്‍ റിമാന്റില്‍ കഴിയുകയാണ്. ഇതോടെ സംഭവത്തില്‍ ഏഴ് പേര്‍ പിടിയിലായി. ഇനി പിടിയിലാകാനുള്ളവരില്‍ ഒരാള്‍ ക്വട്ടേഷന്‍ ഏറ്റെടുത്ത നിക്‌സനും കൃത്യം നടത്തിയ നാലംഗ സംഘത്തിലെ ജിന്നാസിന്റെ സുഹൃത്തുമാണ്.
കഴിഞ്ഞ പതിനൊന്നിന് രാത്രി എട്ടേമുക്കാലോടെയാണ് പാമ്പായിമൂലയിലെ വസ്ത്രശാലയിലെത്തിയ നാലംഗ സംഘം ബാലുവിനെ മൃഗീയമായി വെട്ടി കൊലപ്പെടുത്താന്‍ ശ്രമിച്ചത്.