കഠിനംകുളം: കൈവിലങ്ങുമായി പൊലിസിനെ ആക്രമിച്ച പെരുമാതുറ ഒറ്റപ്പന സ്വദേശി നിസാറി(40) നെ രക്ഷപ്പെടുത്തിയ കേസില്‍ മൂന്നു പ്രതികള്‍ കൂടി അറസ്റ്റിലായി. പുതുക്കുറിച്ച് മെഹ്ദീന്‍ പള്ളിക്കടുത്ത് താമസിക്കുന്ന ഹജ്ജ് മുഹമ്മദ് (34), മാടന്‍വിള സ്വദേശികളായ ഷാമിന്‍ (24), സജാദ് (40) എന്നിവരെയാണ് കഠിനംകുളം പൊലിസ് അറസ്റ്റുചെയ്തത്. ഒരു മാസം മുന്‍പ് കഠിനംകുളം പൊലിസ് ഒറ്റപ്പനവെച്ച് പിടികൂടി ജീപ്പിലാക്കി സ്റ്റേഷനിലേയ്ക്കു കൊണ്ടുവരാന്‍ ശ്രമിച്ച കഞ്ചാവ് കേസിലെ പ്രതിയെ ജീപ്പ് തടഞ്ഞ് ചിലര്‍ പൊലിസിനെ മര്‍ദിച്ചശേഷം കൈവിലങ്ങുകളോടെ നിസാറിനെ രക്ഷപ്പെടുത്തുകയായിരുന്നു. നിസാറിന്റെ കൈവിലങ്ങ് ഒളി സങ്കേതത്തില്‍ വെച്ച് കട്ടര്‍കൊണ്ട് അറുത്തുമാറ്റിയത് ഹജ്ജ് മുഹമ്മദ് ആണെന്ന് പൊലിസ് പറഞ്ഞു. ഇയാളെ ഒളിപ്പിച്ചതിനാണ് മറ്റുള്ളവരെ അറസ്റ്റ് ചെയ്തത്. നിസാറിനെ ഒരാഴ്ച മുന്‍പ് അറസ്റ്റുചെയ്തിരുന്നു.