റാന്നി: ശബരിമലയില്‍ ചിത്തിര ആട്ടവിശേഷത്തിനിടെയുണ്ടായ അക്രമവുമായി ബന്ധപ്പെട്ട കേസില്‍ ബി.ജെ.പി നേതാവ് കെ. സുരേന്ദ്രനെ റിമാന്‍ഡ് ചെയ്തു. വെള്ളിയാഴ്ച രാവിലെ റാന്നി കോടതിയില്‍ ഹാജരാക്കിയ കെ. സുരേന്ദ്രനെ ഡിസംബര്‍ ആറുവരെ 14 ദിവസത്തേക്കാണ് റിമാന്‍ഡ് ചെയ്തത്.

സുരേന്ദ്രന്റെ ജാമ്യാപേക്ഷയും സുരേന്ദ്രനെ ചോദ്യം ചെയ്യണം എന്ന പൊലിസിന്റെ ആവശ്യവും തിരുവനന്തപുരം സെന്‍ട്രല്‍ ജയിലിലേക്ക് മാറ്റണമെന്ന സുരേന്ദ്രന്റെ ആവശ്യവും ശനിയാഴ്ച പരിഗണിക്കും.

ചിത്തിര ആട്ടവിശേഷത്തില്‍ 52കാരിയെ തടഞ്ഞസംഭവത്തില്‍ കെ. സുരേന്ദ്രന്‍ ഗുഢാലോചന നടത്തിയെന്ന് കാണിച്ചാണ് പൊലിസ് കേസ് രജിസ്റ്റര്‍ ചെയ്തിരുന്നത്. കെ. സുരേന്ദ്രന് പുറമേ ബി.ജെ.പി നേതാവ് വി.വി. രാജേഷ്, ആര്‍.എസ്.എസ്. നേതാവ് വത്സന്‍ തില്ലങ്കേരി, യുവമോര്‍ച്ച സംസ്ഥാന പ്രസിഡന്റ് പ്രകാശ് ബാബു എന്നിവര്‍ക്കെതിരെയും കേസെടുത്തിരുന്നു.

അതേസമയം, തന്നെ കള്ളക്കേസില്‍ കുടുക്കി ജയിലിലടയ്ക്കാനാണ് മുഖ്യമന്ത്രിയും പൊലിസും ശ്രമിക്കുന്നതെന്നായിരുന്നു കെ. സുരേന്ദ്രന്റെ പ്രതികരണം.