തൃപ്പൂണിത്തുറ: സി.പി.എം പ്രവര്‍ത്തകര്‍ സി.പി.ഐ ല്‍ ചേര്‍ന്ന ഉദയംപേരൂരില്‍ സി.പി.ഐ പുതിയ ലോക്കല്‍ കമ്മിറ്റികളും ഭാരവാഹികളേയും പ്രഖ്യാപിച്ചു.ഉദയംപേരൂര്‍, തെക്കന്‍ പറവൂര്‍ എന്നിങ്ങനെ രണ്ടു ലോക്കല്‍ കമ്മറ്റികളാണ് നിലവില്‍ വന്നത്. ഉദയംപേരൂര്‍ ലോക്കല്‍ കമ്മറ്റിയില്‍ 16 ബ്രാഞ്ചുകമ്മറ്റികളും തെക്കന്‍ പറവൂരില്‍ 12 ബ്രാഞ്ച് കമ്മറ്റികളുമാണുള്ളത്.ഉദയംപേരൂരില്‍ എ.ഐ.വൈ.എഫ് നേതാവു കൂടിയായ ആല്‍വിന്‍ സേവ്യറും, തെക്കന്‍ പറവൂരില്‍ എസ്.എ ഗോപിയും ലോക്കല്‍ സെക്രട്ടറിമാരായി തെരഞ്ഞെടുക്കപ്പെട്ടു.
ഇപ്പോള്‍ ഉദയംപേരൂരില്‍ 387 അംഗങ്ങളാണ് സി.പി.ഐയിലുള്ളത്. നേരത്തെ ഇത് 124 ആയിരുരുന്നു. ഇന്നലെ വൈകീട്ട് ഏഴിന് നടക്കാവു് കമ്യൂണിറ്റി ഹാളില്‍ നടന്ന പാര്‍ട്ടി അംഗങ്ങളുടെ യോഗത്തില്‍ സി.പി.ഐ ജില്ലാ അസിസ്റ്റന്റ് സെക്രട്ടറി കെ.എന്‍ സുഗതനാണ് കമ്മറ്റി അംഗങ്ങളേയും ഭാരവാഹികളേയും പ്രഖ്യാപിച്ചത്.
യോഗത്തില്‍ എന്‍.എന്‍ സോമരാജന്‍ അദ്ധ്യക്ഷനായിരുന്നു. സി.പി.ഐ മണ്ഡലം സെക്രട്ടറി പി.വി ചന്ദ്ര ബോസ്, ടി. രഘുവരന്‍, വി.ഒ ജോണി, പി.ആര്‍ റെനീഷ്, എസ്.എ ഗോപി, മല്ലിക സ്റ്റാലിന്‍ ,അഡ്വ: പി.വി പ്രകാശന്‍ ആല്‍വിന്‍ സേവ്യര്‍ എന്നിവര്‍ സംസാരിച്ചു.