തിരുവനന്തപുരം: സ്വകാര്യ ആശുപത്രികളിലെ നഴ്‌സുമാരുടെ ശമ്പളവര്‍ധന സംബന്ധിച്ച് വിളിച്ചുചേര്‍ത്ത വ്യവസായബന്ധ സമിതി യോഗം തീരുമാനമാകാതെ പിരിഞ്ഞു.

അടിസ്ഥാന ശമ്പളം 20,000 രൂപയാക്കണമെന്ന ആവശ്യത്തില്‍ യുനൈറ്റഡ് നഴ്‌സസ് അസോസിയേഷനും 80 മുതല്‍ 100 ശതമാനം വരെ വര്‍ധന നല്‍കാനാകില്ലെന്ന നിലപാടില്‍ ആശുപത്രി മാനേജ്‌മെന്റുകളും ഉറച്ചുനിന്നതോടെയാണ് ചര്‍ച്ച പരാജയപ്പെട്ടത്.

2016 ജനുവരി 29ലെ സുപ്രിംകോടതി നിര്‍ദേശത്തിന്റെ അടിസ്ഥാനത്തില്‍ അടിസ്ഥാനശമ്പളം 20,000 രൂപയാക്കണമെന്നാണ് നഴ്‌സുമാരുടെ ആവശ്യം. എന്നാല്‍, 30 ശതമാനത്തിലധികം വര്‍ധനവ് നല്‍കാനാകില്ലെന്ന് മാനേജ്‌മെന്റ് പ്രതിനിധികള്‍ വ്യക്തമാക്കി.

ഈ സാഹചര്യത്തില്‍ തുടര്‍ചര്‍ച്ചകള്‍ സര്‍ക്കാരിന്റെ മേല്‍നോട്ടത്തില്‍ നടക്കട്ടെയെന്ന് ലേബര്‍ കമ്മിഷണര്‍ കെ. ബിജു നിര്‍ദേശിച്ചു. ഇത് ഇരുകൂട്ടരും അംഗീകരിച്ചു. ഇതേത്തുടര്‍ന്ന് തൊഴില്‍മന്ത്രി ടി.പി. രാമകൃഷ്ണന്റെ അധ്യക്ഷതയില്‍ തുടര്‍യോഗങ്ങള്‍ ചേരുമെന്ന് കമ്മിഷണര്‍ അറിയിച്ചു.
മന്ത്രിതല ചര്‍ച്ച നടക്കുംവരെ പണിമുടക്ക് സമരം ഉണ്ടാകില്ലെന്ന് നഴ്‌സസ് അസോസിയേഷന്‍ അറിയിച്ചിട്ടുണ്ട്. അതേസമയം, ശമ്പള വര്‍ധനവ് ആവശ്യപ്പെട്ട് നാളെ മുതല്‍ നിരാഹാര സമരത്തിലേക്ക് നീങ്ങുമെന്ന് ഇന്ത്യന്‍ നഴ്‌സസ് അസോസിയേഷന്‍ അറിയിച്ചു. ശമ്പള പരിഷ്‌കരണം നടപ്പാക്കണമെന്ന് കേന്ദ്രസര്‍ക്കാര്‍ കഴിഞ്ഞ സെപ്റ്റംബറില്‍ സംസ്ഥാനങ്ങള്‍ക്ക് നിര്‍ദേശം നല്‍കിയിരുന്നു. ഇത് നടപ്പാക്കാത്ത സാഹചര്യത്തിലാണ് 158 ആശുപത്രികളില്‍ യുനൈറ്റഡ് നഴ്‌സസ് അസോസിയേഷന്‍ സമരത്തിന് നോട്ടിസ് നല്‍കിയത്.