ന്യൂഡല്‍ഹി: മലപ്പുറം ജില്ലയിലെ പുരാതനമായ തിരൂരങ്ങാടി ഖാസി ഹൗസ് അവകാശവാദത്തെ ചൊല്ലിയുള്ള തര്‍ക്കത്തില്‍ ഒ.കെ അബ്ദുല്ലക്കുട്ടി മഖ്ദൂമിക്ക് വിജയം. സയ്യിദ് ഇബ്‌റാഹീം ഖലീല്‍ ബുഖാരിക്കു വേണ്ടി എം.എന്‍ കുഞ്ഞിമുഹമ്മദ് ഹാജി സുപ്രിംകോടതിയില്‍ ഫയല്‍ ചെയ്ത ഹരജിയില്‍ ഒ.കെ അബ്ദുല്ലക്കുട്ടി മഖ്ദൂമിക്ക് അനുകൂലമായി വിധിപുറപ്പെടുവിച്ചു.
15 വര്‍ഷത്തോളമായി തിരൂരങ്ങാടി ഖാസി ഹൗസ് ആസ്ഥാനമായി ഖാസി പദവി വഹിച്ചിരുന്ന ഒ.കെ അബ്ദുല്ലക്കുട്ടി മഖ്ദൂമി നിലനില്‍ക്കെ മഹല്ലിലെ ഒരുവിഭാഗം സയ്യിദ് ഇബ്‌റാഹീം ഖലീല്‍ ബുഖാരിയെ ഖാസിയായി പ്രഖാപിച്ച് ഖാസി ഹൗസിന്റെ അവകാശവാദം ഉന്നയിച്ച് രംഗത്തുവന്നതോടെയാണ് പ്രശ്‌നങ്ങള്‍ക്കു തുടക്കമായത്. പിന്നീട് തിരൂര്‍ ആര്‍.ഡി.ഒ ഖാസി ഹൗസിന്റെ ഉടമസ്ഥാവകാശം എം.എന്‍ കുഞ്ഞി മുഹമ്മദ് ഹാജിക്കു നല്‍കിയിരുന്നു. അതിനെതിരേ ഒ.കെ അബ്ദുല്ലക്കുട്ടി മഖ്ദൂമി കേരള ഹൈക്കോടതിയില്‍നിന്ന് അനുകൂല വിധി സമ്പാദിച്ചു. ഇതു ചോദ്യം ചെയ്തുകൊണ്ടാണ് എം.എന്‍ കുഞ്ഞിമുഹമ്മദ് ഹാജി സുപ്രിം കോടതിയെ സമീപിച്ചത്. സുപ്രിംകോടതി വിശദമായ വാദം കേള്‍ക്കുകയും എം.എന്‍ കുഞ്ഞിമുഹമ്മദ് ഹാജിയുടെ ഹരജി തള്ളുകയുമായിരുന്നു.
ക്രമസമാധാനം നിലനിര്‍ത്താന്‍ ആവശ്യമായ നടപടികള്‍ സ്വീകരിക്കാന്‍ കേരള ഹൈക്കോടതി ആര്‍.ഡി.ഒക്ക് നല്‍കിയ നിര്‍ദേശം നടപ്പാക്കണമെന്നും സുപ്രിംകോടതി ഉത്തരവിട്ടു.
ഒ.കെ അബ്ദുല്ലക്കുട്ടി മഖ്ദൂമിക്കു വേണ്ടി മുതിര്‍ന്ന അഭിഭാഷകരായ സിദ്ധാര്‍ഥ് ദവെ, പി.എസ് സുല്‍ഫിക്കര്‍ അലി, മുഹമ്മദ് ത്വയ്യിബ് ഹുദവി തെന്നല എന്നിവര്‍ ഹാജരായി.