കാഞ്ഞങ്ങാട്: എച്ച്-1 എന്‍-1 ബാധിച്ച് ഒന്‍പതു മാസം പ്രായമായമുള്ള കുഞ്ഞിനെയടക്കം ജനറല്‍ ആശുപത്രിയില്‍ പ്രവേശിപ്പിച്ചു. ഡെങ്കിപ്പനി മുതല്‍ എച്ച് 1 എന്‍ 1 പനികള്‍ ബാധിച്ചവരെ കാസര്‍കോട് ജനറല്‍ ആശുപത്രി, കാഞ്ഞങ്ങാട് ജില്ലാ ആശുപത്രി എന്നിവിടങ്ങളില്‍  പ്രവേശിപ്പിച്ചിട്ടുണ്ട്.
ചന്ദ്രഗിരിയിലെ ഒന്‍പതു മാസം പ്രായമായ ആണ്‍ കുഞ്ഞ്, മുട്ട ത്തൊടിയി ലെ രണ്ടര വയസുള്ള പെണ്‍കുട്ടി എന്നിവരാണ് എച്ച്-1 എന്‍-1 ബാധിച്ച് ചികിത്സയില്‍ കഴിയുന്നത്. നാടുനീളെ പകര്‍ച്ചപ്പനിയെ പ്രതിരോധിക്കാന്‍ ശുചീകരണ പ്രവര്‍ത്തനങ്ങളും മറ്റുമായി മുന്നോട്ട് പോവുമ്പോഴാണ് ആശുപത്രികളില്‍ രോഗികളെ കൊണ്ട് നിറയുന്നത്.
കാസര്‍കോട് ജനറല്‍ ആസ്പത്രിയിലും കാഞ്ഞങ്ങാട്ടെ ജില്ലാ ആശുപത്രിയിലും നീലേശ്വരം താലൂക്കാശുപത്രിയിലും കമ്മ്യൂണിറ്റി ഹെല്‍ത്ത് സെന്ററുകളിലും ദിവസവും നൂറു കണക്കിനു പനി രോഗികളാണ് ചികിത്സ തേടിയെത്തുന്നത്.
രണ്ട് ആശുപത്രികളിലെയും ഒ.പി വിഭാഗങ്ങളില്‍ അതിരാവിലെ മുതല്‍ തന്നെ കനത്ത തിരക്കാണ് അനുഭവപ്പെടുന്നത്.പനി ബാധിതരെ കൊണ്ട് ആശുപത്രികള്‍ നിറഞ്ഞതിനാല്‍ പലരെയും കിടത്തി ചികിത്സിക്കാന്‍ കഴിയാത്ത അവസ്ഥയുമുണ്ട്. ഇതിനെക്കാള്‍ കൂടുതല്‍ രോഗികള്‍ ജില്ലയിലെ വിവിധ സ്വകാര്യ ആശുപത്രികളിലും ചികിത്സ തേടിയിട്ടുണ്ട്.
അതേ സമയം ഡെങ്കിപനിയും എച്ച്-1 എന്‍1 പനിയും ബാധിച്ചവര്‍ക്കു നില ഗുരുതരമായാല്‍ ജില്ലയിലെ ആശുപത്രികളില്‍ വിദഗ്ധചികിത്സ നല്‍കാനുള്ള സൗകര്യങ്ങള്‍ ഇല്ല. ഇതേ തുടര്‍ന്ന് ഇവരെ മംഗളൂരുവിലോ പരിയാരം മെഡിക്കല്‍ കോളജിലോ കൊണ്ട് പോവുകയാണ് ചെയ്യുന്നത്.