പ്രവാചകന്‍ മുഹമ്മദ് നബിയുടെ പ്രബോധനങ്ങള്‍ മനുഷ്യസമൂഹത്തിന് ഏറ്റവും പ്രസക്തമായിത്തീരേണ്ട ഒരു ഘട്ടത്തിലൂടെയാണ് ലോകം കടന്നുപോകുന്നത്. സമാധാന പൂര്‍ണമായ ജീവിതം ലോകത്ത് ഇന്ന് എല്ലാവരും കാംക്ഷിക്കുന്നുണ്ട്. ഇസ്‌ലാം മതം മുന്നോട്ടു വയ്ക്കുന്ന ജീവിതദര്‍ശനവും സമാധാനമാണ്. ഇസ്‌ലാം എന്നതിന്റെ അര്‍ഥവും അതു തന്നെയാണ്. ലോകം തേടുന്നതും അതാണ്. പ്രവാചകന്‍ മുഹമ്മദ് നബി മനുഷ്യസമൂഹത്തിന് പകര്‍ന്നു നല്‍കിയതും സമാധാന സന്ദേശമാണ്.
ഏറ്റവും കൂടുതല്‍ പ്രാവര്‍ത്തികമാക്കാന്‍ കഴിയുന്ന ഒന്ന് മാത്രമേ പ്രവാചകന്‍ നമ്മോട് പറഞ്ഞിട്ടുള്ളൂ. തന്റെ ജീവിതത്തില്‍ സങ്കീര്‍ണങ്ങളായ ഒരുപാട് ജീവിത പ്രതിസന്ധികളെ അഭിമുഖീകരിക്കാന്‍ പ്രവാചകന് ഇടയായിട്ടുണ്ട്. അപ്പോഴൊക്കെയും വളരെ പ്രായോഗികമായ ഒരു ജീവിത മാതൃകയെ നമുക്ക് മുന്‍പില്‍ അവതരിപ്പിച്ച് അതിനെയൊക്കെ തന്നെ തരണം ചെയ്യാന്‍ പ്രവാചകന് സാധ്യമായി. അതിന്റെ പ്രധാന കാരണം പ്രപഞ്ചത്തെ സംബന്ധിച്ച് പ്രവാചകന്‍ പുലര്‍ത്തിയിരുന്ന നിഷ്ടമായ നിലപാടുകള്‍ തന്നെയാണ്.
ലോകത്ത് ധാരാളം പ്രവാചകന്‍മാര്‍ അതാത് കാലത്ത് അവതരിച്ചിട്ടുണ്ടെങ്കിലും മുഹമ്മദ് നബിയുടെ മാതൃകകള്‍ ഇന്നും ലോകത്തിന് അത്ഭുതമാണ്. അതുകൊണ്ട് തന്നെയാണ് പ്രവാചകന്റെ ഉത്‌ബോധനങ്ങള്‍ ഇന്നും ലോകത്ത് മുഴങ്ങിക്കേള്‍ക്കുന്നത്. 1,400 വര്‍ഷങ്ങള്‍ക്ക് മുന്‍പ് വെളിപ്പെടുത്തിയതാണ് അവയെങ്കിലും അവയോരോന്നും നൂതനത്തോടെ തന്നെ നമ്മുടെ മുന്‍പില്‍ ആവേശകരമായ മാതൃകയായി നിലനില്‍ക്കുന്നു എന്നത് കൂടുതല്‍ അത്ഭുതപ്പെടുത്തുന്നു.
പ്രപഞ്ചത്തിലെ ഏറ്റവും ഔന്നത്യമേറിയ വിഷയങ്ങളെ കുറിച്ചും ഏറ്റവും സങ്കീര്‍ണമായതിനെ സംബന്ധിച്ചും ഏറ്റവും ലളിതമായ കാര്യങ്ങളെ മുന്‍നിര്‍ത്തിയും അദ്ദേഹം നമ്മെ അത്ഭുതപ്പെടുത്തി. ഇതാണ് ലോകത്തിന് ഇന്നും ഏറ്റവും വലിയ മാതൃകയായി മുഹമ്മദ് നബി നിലകൊള്ളുന്നത്. അധര്‍മങ്ങളില്‍ മാത്രം അഭിരമിച്ച ഒരു ജനസമൂഹത്തെ നന്മയുടെ പാതയിലേക്ക് നയിക്കാന്‍ പ്രവാചകന്‍ സ്വീകരിച്ച മാതൃകകള്‍ ഇന്നും ഏതൊരു രാഷ്ട്രതന്ത്രജ്ഞനും പിന്തുടരാവുന്ന ഒന്നാണ്.