ആലുവ: ശിവരാത്രി മണപ്പുറത്ത് ആരംഭിച്ച പൊലിസ് എയ്ഡ് പോസ്റ്റ് അന്‍വര്‍ സാദത്ത് എം.എല്‍.എ ഉദ്ഘാടനം ചെയ്തു. മുനിസിപ്പല്‍ ചെയര്‍പേഴ്‌സണ്‍ ലിസി എബ്രഹാം, റൂറല്‍ ജില്ലാ പോലീസ് മേധാവി പി.എന്‍. ഉണ്ണിരാജന്‍, നഗരസഭ വൈസ് ചെയര്‍പേഴ്‌സണ്‍ സി. ഓമന, മനോജ് കൃഷ്ണന്‍, രാജീവ് സക്കറിയ. ജെറോം മൈക്കിള്‍, ശ്യാം പത്മനാഭന്‍, സെബി വി. ബാസ്റ്റ്യന്‍, കെ. ജയകുമാര്‍, പി.എം. മൂസാക്കുട്ടി, ശ്യാം പത്മനാഭന്‍, പി.സി. ആന്റണി, സി.ഐ വിശാല്‍ ജോണ്‍സണ്‍, എസ്.ഐ ഹണി കെ. ദാസ്, ദേവസ്വം ഉദ്യോഗസ്ഥര്‍ എന്നിവരും യോഗത്തില്‍ സംസാരിച്ചു.
സാമൂഹ്യവിരുദ്ധ ശല്യം നേരിടാന്‍ പൊലീസ് എയ്ഡ് പോസ്റ്റ് ആരംഭിക്കുമെന്ന അധികൃതരുടെ വാഗ്ദാനം പത്ത് മാസത്തിന് ശേഷമാണ് യാഥാര്‍ത്ഥ്യമായത്. തിരുവിതാംകൂര്‍ ദേവസ്വം അഡ്മിനിസ്‌ട്രേഷന്‍ ഓഫീസ് കെട്ടിടത്തിന് മുകളില്‍ ദേവസ്വം പത്ത് ലക്ഷം രൂപ ചെലവഴിച്ച് നിര്‍മ്മിച്ച കെട്ടിടത്തില്‍ ഇന്നലെ രാവിലെയാണ് എയ്ഡ് പോസ്റ്റ് തുറന്നത്.എയ്ഡ്‌പോസ്റ്റില്‍ ഫോണ്‍ ഇല്ലെങ്കിലും വയര്‍ലെസ് സെറ്റ് ഒരുക്കിയിട്ടുണ്ട്. കഴിഞ്ഞ ഒക്ടോബറില്‍ മണപ്പുറത്തേക്കുള്ള സ്ഥിരംനടപ്പാലം ശിലാസ്ഥാപന വേളയില്‍ ആഭ്യന്തര മന്ത്രിയായിരുന്ന രമേശ് ചെന്നിത്തലയാണ് പൊലീസ് എയ്ഡ്‌പോസ്റ്റ് ആരംഭിക്കുമെന്ന് പ്രഖ്യാപിച്ചത്.
ദേവസ്വം സൗകര്യം നല്‍കിയാല്‍ പാലം ഉദ്ഘാടനത്തിന് മുമ്പേ തുറക്കാമെന്നായിരുന്നു വാഗ്ദാനം. ഇതനുസരിച്ച് ദേവസ്വം അഡ്മിനിസ്‌ട്രേഷന്‍ കെട്ടിടത്തിന് മുകളില്‍ സൗകര്യമൊരുക്കിയെങ്കിലും വാഗ്ദാനം നടപ്പായില്ല. പൊലീസിലെ അംഗബല കുറവും എയ്ഡ്‌പോസ്റ്റ് കെട്ടിടത്തിന്റെ രണ്ടാം നിലയിലായതും പൊലീസിന് പദ്ധതിയോട് താത്പര്യമില്ലാതാക്കി. ഇത് പരിഹരിക്കാന്‍ ജനപ്രതിനിധികളും ശ്രമിക്കാതിരുന്നതോടെ പദ്ധതി അവതാളത്തിലായി. ഇതിനിടയില്‍ പാലത്തിന്റെ ഉദ്ഘാടനവും നടന്നു.കര്‍ക്കിടക വാവുബലി ഒരുക്കം വിശദീകരിക്കാന്‍ ദേവസ്വം ബോര്‍ഡ് അംഗം അജയ് തറയില്‍ വിളിച്ചുചേര്‍ത്ത പത്രസമ്മേളനത്തില്‍ മണപ്പുറം പാലത്തില്‍ സാമൂഹ്യവിരുദ്ധ ശല്യമായതിനാല്‍ ആരാധനക്ക് ശേഷം പാലം അടച്ചിടണമെന്ന് ആവശ്യമുന്നയിച്ചിരുന്നു. മാത്രമല്ല, പാലം ദേവസ്വത്തിന് കൈമാറണമെന്ന ഹൈക്കോടതി ഉത്തരവ് നടപ്പാക്കണമെന്നും ആവശ്യപ്പെട്ടു. കോടതി ഉത്തരവ് നടപ്പാക്കണമെന്നാവശ്യപ്പെട്ട് കോടതിയെ സമീപിക്കുമെന്ന് ക്ഷേത്ര ഉപദേശക സമിതിയും പ്രഖ്യാപിച്ചതോടെ എയ്ഡ് പോസ്റ്റ് തുറക്കാതെ നിവൃത്തിയില്ലെന്നായി. തുടര്‍ന്നാണ് യുദ്ധകാലടിസ്ഥാനത്തില്‍ നടപടിയായത്.