കാക്കനാട് : പടമുകളില്‍ വൈകുന്നേരം നടക്കാനിറങ്ങിയ പ്രവാസികളായ ദമ്പതികളെ അക്രമിച്ചു കൊലപ്പെടുത്താന്‍  ശ്രമിച്ച കേസിലെ പ്രതികളെ തൃക്കാക്കര എസ്.പി ബിനോയിയുടെ നേതൃത്വത്തിലുള്ള പൊലിസ് സംഘം അറസ്റ്റ് ചെയ്തു. കാക്കനാട് പൊയ്ച്ചിറയില്‍ നിന്നും കിഴക്കമ്പലത്ത് കൈതാരത്ത് വീട്ടില്‍ വാടകക്ക് താമസിക്കുന്ന 50 വയസ്സുകാരനായ അന്‍സാര്‍, ഇരുമ്പനം തട്ടാശ്ശേരി വീട്ടില്‍ ചുണ്ടെലി എന്ന് വിളിക്കുന്ന വിനോദ് എന്നിവരാണ് അറസ്റ്റിലായത്. ഓഗസ്റ്റ് ഒന്നിനാണ് കേസിനാസ്പദമായ സംഭവം.
പടമുകള്‍ ആര്‍.ഡി.എസ് ഫ്‌ളാറ്റില്‍ താമസിക്കുന്ന പ്രവാസികളായ ദമ്പതികള്‍ സമീപത്തുള്ള റോഡില്‍ നടക്കാനിറങ്ങിയതായിരുന്നു. പ്രതികള്‍ ദമ്പതികളെ തടഞ്ഞു നിറുത്തി ചോദ്യം ചെയ്യുകയും തുടര്‍ന്ന് ദേഹോപദ്രവം ഏല്‍പ്പിക്കുവയുമായിരുന്നു. തൃക്കാക്കര എസ് ഐ സുജിത്ത്, എ.സി.പി സ്‌ക്വാഡിലെ അംഗങ്ങളായ എസ് ഐ തിലകരാജ്, എ എസ് ഐ വിനായകന്‍, എസ്.സി.പി.ഒ ബേസില്‍ എന്നിവര്‍ ചേര്‍ന്നാണ് പ്രതിയെ അറസ്റ്റ് ചെയ്തത്. പ്രതികളായ രണ്ടു പേരും സിറ്റിയിലെ വിവിധ സ്റ്റേഷനുകളിലെ പിടിച്ചുപറി, മയക്കുമരുന്ന് കേസുകളിലെ പ്രതികളാണ്. ഇന്നലെ കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു.