സുല്‍ത്താന്‍ ബത്തേരി: ഓടപ്പള്ളം ഗവ. ഹൈസ്‌കൂള്‍ വിദ്യാര്‍ഥികള്‍ ഇംഗ്ലീഷ് പഠനത്തിനായി കൂട്ടുകൂടുന്നത് യൂറോപ്യന്‍ രാജ്യങ്ങളിലെ കുട്ടികളുമായിട്ടാണ്.
സ്‌കൂളിലാരംഭിച്ച സ്മാര്‍ട്ട് ഇംഗ്ലീഷ് ലാബ് പ്രവര്‍ത്തനങ്ങളോടനുബന്ധിച്ച് ആവിഷ്‌ക്കരിച്ച പ്രത്യേക പദ്ധതി വഴി സ്‌പെയിന്‍, പോളണ്ട്, റഷ്യ എന്നീ രാജ്യങ്ങളിലെ ഓരോ സ്‌കൂളുകളിലെ കുട്ടികളുമായി ഓടപ്പള്ളത്തെ കുട്ടികള്‍ കത്തുകളും കാര്‍ഡുകളും കൈമാറി.
പോളണ്ടിലെ ജോസഫ് പില്‍സുട്‌സ്‌കി സ്‌കൂള്‍, റഷ്യയിലെ ബ്രയോസ്‌ക് സിറ്റി ലൈസിയം സ്‌ക്കൂള്‍, സ്‌പെയിനിലെ ബിസ്‌കോത് സാല്‍ദേ സ്‌കൂള്‍ എന്നീ വിദ്യാലയങ്ങളിലെ കുട്ടികളാണ് ഇപ്പോള്‍ ഓടപ്പള്ളത്തെ കുട്ടികളുടെ കൂട്ടുകാര്‍. പോളണ്ടില്‍ നിന്നും കഴിഞ്ഞ ദിവസം ലഭിച്ച കത്തുകള്‍ ഏറെ കൗതുകത്തോടെയാണ് കുട്ടികള്‍ വായിച്ചു തീര്‍ത്തത്.
ഇവര്‍ക്കായി മറുപടി കത്തുകളും ഗ്രീറ്റിങ് കാര്‍ഡുകളും കേരളീയ കലാരൂപങ്ങളുടെ ഇംഗ്ലീഷിലുള്ള വിവരണങ്ങളും ചിത്രങ്ങളും അയച്ചു.
സ്‌പെയിനിലേക്ക് കുട്ടികള്‍ തയാറാക്കിയ കത്തുകളും ഇംഗ്ലീഷില്‍ തയാറാക്കിയ ഡോക്യുമെന്ററിയും അയച്ചിരുന്നു.
മറുപടിയായി സ്‌പെയിനിലെ കുട്ടികള്‍ ഓടപ്പള്ളം സ്‌കൂളിലേക്ക് വീഡിയോ സന്ദേശവും കൈമാറി.
റഷ്യയിലെ കൂട്ടുകാര്‍ ഓടപ്പള്ളത്തെ കുട്ടികള്‍ക്കായി അവരുടെ നഗരത്തിലെ പാര്‍ക്കുകളെപ്പറ്റിയുള്ള വിവരണങ്ങളും ചിത്രങ്ങളും തയാറാക്കുന്ന തിരക്കിലാണിപ്പോള്‍. ഓടപ്പള്ളം സ്‌കൂളിലെ മുഴുവന്‍ കുട്ടികളെയും പരിപാടിയുടെ ഭാഗമാക്കിയിട്ടുണ്ട്.
സ്വാഭാവികമായി ഇംഗ്ലീഷ് ഭാഷ കൈകാര്യം ചെയ്യാന്‍ അവസരമൊരുക്കുക വഴി ഇംഗ്ലീഷ് പഠനത്തില്‍ മികച്ച മാതൃകയും നിലവാരവും കൈവരിക്കലാണ് വര്‍ഷം മുഴുവന്‍ നീണ്ടു നില്‍ക്കുന്ന പരിപാടിയുടെ ലക്ഷ്യം.
വൈകാതെ തന്നെ മറ്റു രാജ്യങ്ങളിലെ ഈ കൂട്ടുകാരുമായി വീഡിയോ കോണ്‍ഫറന്‍സ് നടത്താനും ആസൂത്രണം ചെയ്തിട്ടുണ്ട്.
അന്താരാഷ്ട്രനിലവാരത്തില്‍ സ്‌കൂളിലൊരുക്കിയ ഇംഗ്ലീഷ് ലാബ് വഴി നിലവില്‍ കുട്ടികള്‍ വീഡിയോ കോണ്‍ഫറന്‍സ് വഴി പഠനം നടത്തുന്നുണ്ട്.