കണ്ണൂര്‍: പനിയും പകര്‍ച്ച വ്യാധികളും തടയുന്നതിന് സംസ്ഥാനവ്യാപകമായി മൂന്നു ദിവസം നീളുന്ന ശുചീകരണ യജ്ഞം മുഖ്യമന്ത്രി പിണറായി വിജയന്‍ ഉദ്ഘാടനം ചെയ്തു. കണ്ണൂര്‍ കോര്‍പറേഷന്‍ പരിധിയിലെ സിറ്റി വലിയകുളം പരിസരത്ത് മുഖ്യമന്ത്രി ശുചീകരണ പ്രവൃത്തിയിലേര്‍പ്പെട്ടു.
മന്ത്രി കടന്നപ്പള്ളി രാമചന്ദ്രന്‍, മേയര്‍ ഇ.പി ലത, എം.പിമാരായ പി.കെ ശ്രീമതി, കെ.കെ രാഗേഷ്, ജില്ലാ പഞ്ചായത്ത് പ്രസിഡന്റ് കെ.വി സുമേഷ്, ഡെപ്യൂട്ടി മേയര്‍ പി.കെ രാഗേഷ്, മുന്‍ എം.എല്‍.എ പി. ജയരാജന്‍, കൗണ്‍സിലര്‍മാരായ അഡ്വ. പി. ഇന്ദിര, അഡ്വ. ടി.ഒ മോഹനന്‍, എന്‍. ബാലകൃഷ്ണന്‍, സി. സമീര്‍, ഇ. ബീന, ആശ, സുമ ബാലകൃഷ്ണന്‍, റഷീദ മഹലില്‍, ഒ.കെ വിനീഷ്, ജനപ്രതിനിധികള്‍, വിവിധ രാഷ്ട്രീയ പാര്‍ട്ടി പ്രതിനിധികള്‍ പങ്കെടുത്തു. രാവിലെ എട്ടിന് ആരംഭിച്ച ശുചീകരണം ഉച്ചവരെ നീണ്ടു. ജനപ്രതിനിധികളും നാട്ടുകാരും ചേര്‍ന്ന് വലിയകുളം പരിസരം മാലിന്യമുക്തമാക്കി.
ശുചീകരണ യജ്ഞം വിജയിപ്പിക്കാനും പ്രാദേശിക തലത്തില്‍ ഈ പ്രവര്‍ത്തനം തുടര്‍ന്നുകൊണ്ടുപോകാനും നേരത്തെ സര്‍വകക്ഷി യോഗം അഭ്യര്‍ഥിച്ചിരുന്നു.
ശുചീകരണത്തിന് ജനപങ്കാളിത്തം ഉറപ്പാക്കുന്നതിന് ജില്ലാതലത്തിലും തദ്ദേശസ്വയംഭരണ സ്ഥാപന അടിസ്ഥാനത്തിലും സര്‍വകക്ഷി യോഗങ്ങളും വിളിച്ചുചേര്‍ത്തിരുന്നു.