പൊന്നാനി: പൊന്നാനിയിലും പരിസരങ്ങളിലും കടലാക്രമണം രൂക്ഷമായി തുടരുന്നു. ലൈറ്റ് ഹൗസ് തകര്‍ച്ചാ ഭീഷണിയില്‍. കനത്ത തിരയില്‍ ലൈറ്റ് ഹൗസിനു സമീപത്തുള്ള റോഡ് പൂര്‍ണമായും തകര്‍ന്നു. ചുറ്റുമതിലുകളും തകര്‍ന്നിട്ടുണ്ട്. തിരകളിപ്പോള്‍ ലൈറ്റ് ഹൗസിലേക്കാണ് അടിച്ചുകയറുന്നത്.
സംഭവവുമായി ബന്ധപ്പെട്ട് ജില്ലാ കലക്ടര്‍ പൊന്നാനി തഹസില്‍ദാറോട് റിപ്പോര്‍ട്ട് ആവശ്യപ്പെട്ടിട്ടുണ്ട്. വിശദമായ റിപ്പോര്‍ട്ട് നല്‍കിയതായി തഹസില്‍ദാര്‍ അറിയിച്ചു. ലൈറ്റ് ഹൗസിനു സമീപം എത്രയും വേഗത്തില്‍ കരിങ്കല്ലുകള്‍ പാകാന്‍ ഇറിഗേഷന്‍ വകുപ്പിനോട് തഹസില്‍ദാര്‍ രേഖാമൂലം ആവശ്യപ്പെട്ടിട്ടുണ്ട്. എന്നാല്‍, കരിങ്കല്ലുകള്‍ കിട്ടാനില്ലെന്നാണ് ഇതുസംബന്ധമായി ഇറിഗേഷന്‍ വകുപ്പ് നല്‍കിയ വിശദീകരണം. കഴിഞ്ഞ വര്‍ഷവും ലൈറ്റ് ഹൗസിന്റെ പരിസരം കടലാക്രമണ ഭീഷണി നേരിട്ടിരുന്നു.