എടപ്പാള്‍: നരിപ്പറമ്പിലെ അനധികൃത കച്ചവടങ്ങള്‍  ഒഴിപ്പിച്ചു. ജലസേചനവകുപ്പ് എ.ഇ പി.പി എബ്രഹാമിന്റെ നേതൃത്വത്തിലുള്ള സംഘമാണ് ഒഴിപ്പിക്കലിന് നേതൃത്വം നല്‍കിയത്. കഴിഞ്ഞ ദിവസം കച്ചവടം ഒഴുപ്പിക്കുന്നതിന്റെ ഭാഗമായി റവന്യൂ അധികാരികളും ജലവിഭവ വകുപ്പ് അധികാരികളും സ്ഥലത്തെത്തിയെങ്കിലും പെരുന്നാള്‍ വ്യാപാരം നടക്കുന്നതിനാല്‍ കടകള്‍ ഒഴിയാന്‍ സമയം കൂടുതല്‍ വേണമെന്ന കച്ചവടക്കാര്‍ ആവശ്യപ്പെട്ടതിനെ തുടര്‍ന്ന് നാല് ദിവസം അനുവദിച്ചിരുന്നു. നല്‍കിയ സമയം ഇന്നലെ അവസാനിച്ചതിനെ തുടര്‍ന്നാണ് നടപടികള്‍ എടുത്തത്.
അനധികൃത കച്ചവടംമൂലം പ്രദേശത്തു മാലിന്യപ്രശ്‌നവും രൂക്ഷമാണെന്നും ഇവിടങ്ങളില്‍നിന്നുള്ള മാലിന്യം സമീപത്തെ വെള്ളക്കെട്ടില്‍ കൊണ്ടിടുന്നതുമൂലം പകര്‍ച്ചവ്യാധി ഭീഷണിയും നിലനില്‍ക്കുന്നുണ്ടെന്നും ആരോപിച്ചാണ് നാട്ടുകാര്‍ കച്ചവടത്തിനെതിരേ രംഗത്തുവന്നത്. ഇതേ തുടര്‍ന്ന് നരിപ്പറമ്പിലെ അനധികൃത കടകള്‍ പൊളിച്ചുനീക്കണമെന്ന് ആവശ്യപ്പെട്ടു സമീപവാസികളും നാട്ടുകാരും പഞ്ചായത്ത്, ഇറിഗേഷന്‍ അധികൃതര്‍ക്കും ആര്‍ഡിഒയ്ക്കും പരാതി നല്‍കുകയും ഇതിന്റെ അടിസ്ഥാനത്തില്‍ അനധികൃത കച്ചവടം ഉടന്‍ ഒഴിപ്പിക്കണമെന്ന് ആര്‍.ഡി.ഒ ഉത്തരവിടുകയും ചെയ്തിരുന്നു.
എന്നാല്‍ കച്ചവടം ഒഴിയാത്തതിനെ തുടര്‍ന്ന് നാട്ടുകാരുടെ പ്രതിഷേധം ശക്തമായി. രണ്ടുതവണ കച്ചവടം ഒഴിപ്പിക്കാന്‍ ശ്രമം നടന്നിരുന്നെങ്കിലും സഘര്‍ഷത്തില്‍ കലാശിച്ചിരുന്നു. ഇതിനിടയില്‍ നാട്ടുകാര്‍ സംഘടിച്ചു കടകള്‍ പൊളിച്ചുനീക്കാന്‍ ശ്രമിച്ചത് സംഘര്‍ഷം രൂക്ഷമാക്കി.